УЕФА МУ ОБЈАВИ ВОЈНА НА ИНФАНТИНО Едногласно избра противкандидат за претседател на ФИФА

Европската фудбалска централа, предводена од Александар Чеферин, застана зад претседателот на Француската фудбалска федерација, Филип Дијало, кој ќе се соочи со Џани Инфантино на изборите во март 2027 година.

УЕФА МУ ОБЈАВИ ВОЈНА НА ИНФАНТИНО Едногласно избра противкандидат за претседател на ФИФА
Фото: Принтскрин

УЕФА направи сериозен политички потег против актуелниот претседател на ФИФА, Џани Инфантино, откако едногласно ја поддржа кандидатурата на претседателот на Француската фудбалска федерација, Филип Дијало, за изборите за прв човек на светскиот фудбал во март 2027 година.

Одлуката била донесена на состанок со кој претседавал претседателот на УЕФА, Александар Чеферин. Националните асоцијации претставени во Извршниот комитет на УЕФА и Советот на ФИФА формално го поканиле 63-годишниот Французин да влезе во трката за претседателската функција, ветувајќи му целосна поддршка.

Дијало ја прифатил поканата, а неговата кандидатура треба да добие и формално одобрение од Извршниот комитет на Француската фудбалска федерација, најавено за 17 ноември.

Во официјалното соопштение, УЕФА изразила сериозна загриженост за насоката во која се движи ФИФА, повикувајќи на враќање на довербата и единството во светскиот фудбал, повисоки стандарди на управување и поголема соработка со националните фудбалски федерации.

Една од главните точки на несогласување е обидот на Инфантино да привлече приватни инвеститори во нова комерцијална структура на ФИФА, поврзана со правата на фудбалските натпреварувања, вклучително и Светското првенство. Овој проект наиде на сериозен отпор и на крајот беше напуштен, што дополнително ги продлабочи несогласувањата во врвот на светската фудбалска организација.

Тензиите станаа особено видливи во септември, кога Француската фудбалска федерација официјално ја повлече поддршката за реизборот на Инфантино. Тогаш Дијало оцени дека довербата во актуелниот претседател на ФИФА е нарушена.

Со поддршката од УЕФА за неговата кандидатура, изборите во март 2027 година добиваат сосема поинаква политичка тежина. Инфантино, кој досега имаше силна позиција на чело на светскиот фудбал, сега се соочува со организиран предизвик од европската фудбалска централа.

Останува да се види дали поддршката на УЕФА ќе се претвори во поширок меѓународен фронт против актуелниот претседател на ФИФА.

CATEGORIES
Share This