МИЦКОСКИ: ОВА Е ЛОША ВЕСТ ЗА ОПОЗИЦИЈАТА Македонија бележи над 1,1 милион туристи и раст на ноќевањата
Премиерот соопшти дека заклучно со септември веќе е надмината целта од еден милион туристи, а во третиот квартал се регистрирани 35.000 туристи и 110.000 ноќевања повеќе во споредба со истиот период минатата година.
Мицкоски посочи дека владината амбиција на почетокот на годината била Македонија да достигне еден милион туристи и три милиони ноќевања, но најновите податоци на Државниот завод за статистика покажуваат дека целта за бројот на туристи веќе е надмината.
Дополнително, споредбата на третиот квартал со истиот период минатата година покажува зголемување за 35.000 туристи и 110.000 ноќевања, што претставува раст од повеќе од шест проценти и по двете основи.
„Податоците се прилично охрабрувачки. Ние веќе, заклучно со септември, сме на повеќе од 1.100.000 туристи и скоро три милиони ноќевања, што значи дека ќе одиме над тоа што сме го предвиделе како цел. Во третиот квартал, споредено со третиот квартал минатата година, имаме 35.000 туристи повеќе и 110.000 ноќевања повеќе, што е добро, тоа е повеќе од шест отсто раст и по една и по друга основа“, изјави премиерот.
Тој упати и политичка порака до опозицијата, оценувајќи дека позитивните економски показатели не се во прилог на нејзините очекувања.
„И повторно, ова е лоша вест за опозицијата. Тие би сакале да назадуваме, но, за нивна жал, а за добро на граѓаните, одиме напред“, рече Мицкоски.
Изјавата ја даде по увидот во градежните активности на проектот „Подобрување на системот за водоснабдување во руралната населба Каменик“, во Општина Кисела Вода.
