ОТВОРЕНО ПРЕДАВАЊЕ ЗА РОДИТЕЛИ И КРЕАТИВНА РАБОТИЛНИЦА ЗА ДЕЦА Започнува програмата „Заедно знаеме повеќе“

Иницијативата „Заедно знаеме повеќе“ во организација на Скопје Сити Мол и во соработка со киното Синеплекс, обединува бесплатни едукативни, информативни и инспиративни предавања во рамките на „Платформата за нови сознанија“ и интерактивни работилници за деца „Клуб на истражувачи“, создавајќи простор за учење, истражување, креативност и споделување знаења.

Преку програмата „Заедно знаеме повеќе“, се отвора простор за предавања и разговори со професионалци, кои нудат стручни одговори на актуелни општествени прашања и глобални трендови преку искуственото знаење на локалната сцена.

Предавањата ќе ги водат професионалци од различни области – помеѓу нив нутриционисти, психотерапевти, писатели, визуелни уметници, претприемачи и стручњаци за детскиот развој, кои ќе отвораат конкретни теми и ќе понудат практични насоки и стручни согледувања.

За најмладите пак, работилниците нудат можност преку практични активности да откриваат како функционира природата, да поставуваат прашања, да испробуваат нови техники и самостојно да создаваат. Научните и креативните работилници ќе бидат под водство на биолози, уметници и едукатори.

Сите предавања и работилници се бесплатни, со што програмата им овозможува на семејствата да поминат време заедно и да понесат нови и практични вештини.

Програмата опфаќа осум активности во ноември, декември и јануари.

Првото предавање и работилница се закажани за недела, 8 ноември, кога програмата носи две различни теми – нутритивната поддршка во раниот детски развој и неверојатните животни циклуси.

Точно на пладне, во 12 часот, на 8 ноември (недела), во Синеплекс, професионалната нутриционистка Ирина Лазарова од Nutricoach ќе одржи предавање на тема „Нутритивна поддршка во раниот детски развој“. Разговорот ќе биде посветен на важноста на исхраната во првите години од животот, формирањето здрави прехранбени навики и начините на кои родителите можат да им помогнат на децата да прифатат нови намирници. Предавањето е бесплатно и отворено за сите заинтересирани.

Лазарова ќе проговори за нутритивната вредност на храната, градењето здрав однос кон исхраната, стекнувањето здрави навики во раното детство и вообичаените предизвици со кои се соочуваат родителите, воведување нови намирници, развивање разновидна исхрана и поттикнување позитивни навики кај децата.

„На предавањето ќе зборуваме за тоа како се формираат првите прехранбени навики, зошто некои деца полесно прифаќаат нова храна, додека други се ограничуваат на мал број омилени оброци, и што можат да направат родителите во таквите ситуации. Ќе споделиме практични насоки за поттикнување разновидна исхрана, надминување на пребирливоста и создавање пријатна атмосфера за време на оброците, без присилување, уценување и создавање дополнителен притисок. Ќе зборуваме и за честите грешки во пристапот кон детската исхрана и за тоа како преку малите, секојдневни чекори можеме да изградиме здрав однос кон храната уште од најрана возраст“, вели Лазарова.

Додека родителите ќе имаат можност да слушнат практични совети за исхраната на децата, најмладите ќе можат да се впуштат во сопствено истражување на природата.

Истиот ден на 8 ноември, на вториот кат во Скопје Сити Мол ќе биде одржана научно детска работилница „Од јајце до животно – неверојатни животни циклуси“ под водство на биологот Ангела Тасеска од „Растеме во природа“. Работилницата е наменета за деца од шест години нагоре и ќе се реализира во два термини од 11 до 12 часот и од 12.30 до 13.30 часот.

„На работилницата децата ќе ги запознаеме со промените низ кои минуваат животните додека растат и се развиваат. Преку визуелни примери, споредување и групна игра, децата ќе откриваат како се менуваат пеперутките, жабите и другите животни, што е метаморфоза и зошто некои од нив изгледаат сосема поинаку во различни фази од животот.“, велат организаторите.

На следната средба, закажана за 14 ноември во Синеплекс ќе се одржи предавање за процесот на создавањето на друштвената игра „Синхроницитети“ и како таа помага во развојот на вештините за креативно изразување и човечката конгнитивност.