СКОПЈЕ ВЕЧЕРВА СТАНУВА ФИЛМСКА ПРЕСТОЛНИНА Црвен тепих, светски ѕвезди и нова награда на Скопскиот филмски фестивал
До 9 ноември публиката ќе има можност да проследи бројни филмски премиери, средби со автори и ексклузивни мастерклас сесии.
Со црвен тепих, познати филмски имиња од Европа и доделување на новата награда „Златна Скополија“, вечерва во Македонскиот народен театар се отвора 26. издание на Скопскиот филмски фестивал. До 9 ноември публиката ќе има можност да проследи бројни филмски премиери, средби со автори и ексклузивни мастерклас сесии.
Фестивалската вечер започнува во 19:30 часот со дефиле на црвениот тепих, на кој се очекува да продефилираат филмски автори, актери, гости од странство и истакнати претставници на културно-уметничкиот живот. Официјалната церемонија на отворањето е закажана за 20 часот, а годинава фестивалот носи модернизиран концепт, збогатена програма и силно меѓународно присуство.
Еден од најзначајните моменти на отворањето ќе биде првото доделување на фестивалската награда „Златна Скополија“, наменета за исклучителен придонес кон светската кинематографија. Првите добитници се полската режисерка Малгоржата Шумовска и снимателот и режисер Михал Енглерт. По доделувањето на признанието, фестивалот ќе биде отворен со проекцијата на нивниот најнов филм „Идиот(и)“ (The Idiot(s)), во кој главните улоги ги толкуваат Џони Флин и Ејми Лу Вуд.
Годинашното издание привлече бројни професионалци од европската и регионалната филмска индустрија. Меѓу членовите на меѓународното жири и Фестивалскиот совет се британскиот филмски критичар и селектор Филип Бергсон, британскиот продуцент Стив Абот, регионалниот продуцент Мирослав Могоровиќ, српскиот режисер Павле Вучковиќ и германската филмска селекторка Даниела Вебер.
Од Македонија, во фестивалските активности учествуваат актерката и продуцентка Лабина Митевска и режисерот Даријан Пејовски. Меѓу специјалните гости на свеченоста се очекува да биде и познатиот актер, режисер и продуцент Драган Бјелогрлиќ.
Фестивалот ќе биде можност скопската публика непосредно да се сретне и со филмските автори чии остварувања се дел од програмата. Меѓу нив се Халкавт Мустафа, режисер на „No Paradise If You Are Killed by a Woman“, Лоренс Фахардо со „Silenced Nights“, Димитрис Накос со „Life in a Beat“, Габор Холтаи со „Feels Like Home“, како и Сузане Хајнрих и Марчело Бусе, кои го претставуваат филмот „The Miserable Mother“.
Скопскиот филмски фестивал ќе трае до 9 ноември, со разновидна програма што опфаќа премиери на авторски филмови, фестивалски фаворити, филмски разговори и ексклузивни мастерклас сесии со гости-предавачи. Фестивалскиот центар ќе биде во Младинскиот културен центар, а проекциите ќе се одржуваат на две културни локации – Македонскиот народен театар и киното „Фросина“ во МКЦ.
