ХОЛАНДИЈА СТРАВУВА ОД ВИКЕНД НА ХАОС Младите најавуваат немири во повеќе градови
Холандскиот министер за внатрешни работи предупредува на алармантни повици за насилство и вандализам што се шират преку интернет и чет-групи на младите од Генерацијата Z.
Холандија се соочува со предупредувања за можни насилни протести и немири во неколку градови во текот на претстојниот викенд, откако на социјалните мрежи и во интернет-групи почнале да циркулираат повици за јавни нереди и вандализам.
Холандскиот министер за внатрешни работи, Питер Херма, изрази загриженост поради, како што ги оцени, „алармантните тврдења“ за можни планови на млади луѓе за предизвикување насилни инциденти.
Според него, станува збор за сериозна ситуација која бара внимание од надлежните институции, но одговорноста за конкретните безбедносни мерки е во рацете на локалните власти, објавува „NL Times“.
Неколку холандски медиуми објавија дека во земјата циркулираат пораки со повици за јавни немири и вандализам. Според објавените информации, пораките се шират преку чет-групи во кои членуваат млади луѓе од Генерацијата Z, а се однесуваат на можни организирани нереди во повеќе холандски градови.
Засега нема дополнителни официјални информации за конкретните локации, бројот на потенцијални учесници или обемот на најавените инциденти. Министерот Херма посочи дека локалните власти се надлежни за процена на ризиците и преземање мерки за одржување на јавниот ред и безбедноста.
Предупредувањата доаѓаат во период кога ширењето повици за организирани собири преку социјалните мрежи и затворени интернет-групи претставува дополнителен предизвик за безбедносните служби.
