МОСКВА БАРА ОДГОВОРИ ОД СКОПЈЕ Каде се доказите за руската пропаганда

Амбасадата на Руската Федерација во Македонија остро реагираше на соопштението на Агенцијата за национална безбедност (АНБ), во кое се наведува дека во земјата била откриена пропагандна мрежа што дејствувала во интерес на Русија. Од руското дипломатско претставништво категорично ги отфрлаат обвинувањата дека Русија стои зад ширење пропагандни материјали насочени кон поткопување на довербата во институциите и поттикнување етничка и национална нетрпеливост.

Во реакцијата се наведува дека Амбасадата со изненадување го примила соопштението на АНБ од 1 октомври, оценувајќи дека станува збор за сериозни обвинувања за кои македонските институции треба да дадат дополнителни разјаснувања.

Според руската амбасада, веднаш по објавувањето на информациите била испратена дипломатска нота до Министерството за надворешни работи и надворешна трговија, со барање рускиот амбасадор да оствари средба со раководствата на МНР и АНБ. Целта, како што наведуваат, била да се добијат конкретни објаснувања за природата и основата на обвинувањата.

„За жал, до денес не само што не е одржана средбата, туку не е добиен ниту одговор на соодветната нота на Амбасадата“, се наведува во реакцијата.

Од дипломатското претставништво сметаат дека сериозноста на јавно изнесените тврдења бара и соодветна институционална комуникација.

Во реакцијата, руската амбасада отвора и политичко прашање, оценувајќи дека обвинувањата против Русија претставуваат обид да се пренасочи вниманието на македонската јавност од проблемите во односите на Македонија со одредени потенцијални партнери во Европската Унија. Според Амбасадата, префрлањето на одговорноста врз Москва не може да ги прикрие вистинските причини за тие проблеми.

Со ваквиот став, руското дипломатско претставништво директно ја оспорува интерпретацијата на АНБ за наводните активности поврзани со руските интереси.

Посебно внимание во соопштението е посветено на квалификацијата „проруски хибридни активности“, која, според руската амбасада, неоправдано се поврзува со истрага против македонски државјанин.

„Решително ги отфрламе неоснованите обвинувања против нашата земја за ширење пропагандни материјали“, се наведува во соопштението.

Од Амбасадата изразуваат и несогласување со поврзувањето на наводни прекршувања на Кривичниот законик со дејствување во интерес на Русија. Притоа, останува на надлежните македонски институции да ги утврдат фактите и евентуалната кривична одговорност во постапката што се води. На крајот од реакцијата, руската амбасада упати порака и до граѓаните на Македонија, нагласувајќи дека очекува македонските власти да ги разјаснат јавно изнесените обвинувања.

Од Амбасадата изразуваат уверување дека, и покрај актуелните дипломатски несогласувања, традиционалните пријателски чувства меѓу македонскиот и рускиот народ остануваат непроменети.

„Убедени сме дека тој е способен да ја разликува вистината од лагата и да ги извлече вистинските заклучоци од оваа историја“, се наведува во пораката на руското дипломатско претставништво.

Со оваа реакција се отвора ново прашање во односите меѓу Скопје и Москва, додека јавноста очекува дополнителни информации од македонските институции за наводната пропагандна мрежа и за дипломатското барање на Русија.

АНБ УДРИ ПО ПРОРУСКА ПРОПАГАНДНА МРЕЖА Претрес кај македонски државјанин, под лупа клонирани портали