МИЦКОСКИ ПРЕДУПРЕДУВА Шпионските служби на Балканот не мируваат, некој сака да ја вовлече Македонија во туѓи проблеми

Премиерот Христијан Мицкоски предупреди на зголемената нестабилност во Европа и на Балканот, оценувајќи дека постои можност регионалните тензии и проблеми да се пренесат и во Македонија. Во обраќањето на свечената академија „Свои на своето!“, организирана по повод 23 Октомври – Денот на македонската револуционерна борба, тој упати и обвинувања кон дел од опозицијата, за која рече дека би можела да учествува во политички игри од личен интерес.

„Веќе Балканот не е единственото буре барут. Впрочем, Европа станува немирен вулкан. Сè помалку се слуша разумот, а секојдневно ги гледаме протестите, насилството во разни облици, присутни во Европа и кај нашите соседи“, рече Мицкоски.

Тој посочи дека безбедносните служби на Балканот постојано дејствуваат и оти не би го изненадиле обидите некој да ја вовлече Македонија во проблемите на соседните земји или дел од регионалната нестабилност да ја пренесе во земјава.

„Нема да ме зачуди доколку има и такви кои ќе се обидат да нè вмешаат во нивните проблеми или да префрлат дел од нивниот амбиент во нашето секојдневие“, изјави премиерот.

Во тој контекст, Мицкоски оцени дека за такви сценарија би можеле да бидат искористени и домашни политички актери, упатувајќи директни обвинувања кон дел од опозицијата.

„Има неколкумина од опозицијата што за пари и лажни ветувања за фотелја чуда умеат да направат“, рече тој.

Премиерот повика граѓаните да не подлегнуваат на провокации, вештачки наметнати прашања и, како што ги опиша, хиперболизирани етнички теми. Според него, евентуалните кризи би им оделе во прилог на оние кои со децении профитираат на сметка на граѓаните.

„И затоа нема да дозволам никакви нечесни игри, ниту авантури. И ако некој мисли дека може да си игра со државата, нека не ја потценува државата, ниту пак народот“, порача Мицкоски.

Во овој дел од обраќањето премиерот не посочи конкретни држави, служби или лица за кои смета дека би можеле да бидат вклучени во вакви активности, ниту изнесе конкретни докази за своите предупредувања.

Покрај предупредувањата за безбедносните и политичките предизвици, централно место во обраќањето на Мицкоски имаше и историското значење на 23 Октомври, како и одговорноста на денешните генерации кон слободата и државата.

Тој истакна дека одбележувањето на Денот на македонската револуционерна борба не треба да се сведе само на гордост и почит кон минатото, туку треба да поттикне и преиспитување за тоа каква држава се гради и што ќе им биде оставено на идните генерации.

„На 23 Октомври, покрај гордоста, треба да почувствуваме и одговорност. Да застанеме пред нивниот спомен, да се поклониме и искрено да се запрашаме: што правиме ние со слободата за која тие се бореа, за која тие живееја и за која ги положуваа своите животи? Каква држава им оставаме на оние што доаѓаат по нас?“, рече Мицкоски.

Осврнувајќи се на историските корени на организираното македонско револуционерно движење, тој потсети дека формирањето на ВМРО во Солун пред повеќе од еден век означило значаен период во македонската слободарска мисла и дејствување.

Според Мицкоски, основачите на организацијата немале сопствена држава, ниту институции што би ги заштитиле, но биле водени од вербата, храброста и убедувањето дека македонскиот народ заслужува слобода.

Во своето обраќање, премиерот ги спомена Узунов, Груев, Татарчев, Питу и Гоце, посочувајќи ги како симболи на пркосот, посветеноста, мудроста и храброста на македонското револуционерно дело. Тој порача дека историското наследство не смее да биде омаловажувано, без разлика дали критиките доаѓаат однадвор или од луѓе од сопствениот народ.

Мицкоски нагласи дека македонската државност се градела низ прогони, затвори, востанија, војни и жртви, а не преку подарена слобода. И покрај болката, разочарувањата и поделбите, како што рече, опстојувала идејата за сопствена држава и право самостојно да се одлучува за иднината.

„Денес ја имаме таа држава. И токму затоа нашата одговорност е толку голема. Да бидеме свои на своето е нашата најважна потреба, важна за нашето опстојување“, порача премиерот.

Во завршницата од говорот, Мицкоски ја истакна потребата Македонија да ја гради својата иднина врз почитувањето на историското наследство и одговорноста кон младите генерации.

„Тука припаѓаме, тука одлучуваме и тука ќе успееме. Свои на своето. Со корен во минатото и со верба во иднината“, рече Мицкоски на свечената академија, одржана во Македонскиот народен театар.