МВР ВТОРО МЕЃУ МИНИСТЕРСТВАТА СПОРЕД ОТВОРЕНОСТА Исполнети 75,90 отсто од индикаторите
Истражувањето на „Метаморфозис“ покажува подобрување на резултатите на МВР во однос на претходното мерење, со целосна исполнетост на оценуваните индикатори за интегритет и ефикасност.
Министерството за внатрешни работи бележи напредок во најновото истражување на Фондацијата „Метаморфозис“, насловено „Процена на доброто владеење на извршната власт во Северна Македонија и регионот преку Индекс на отвореност 2026“, изработено врз основа на мерењето за 2025 година.
Според резултатите што ги објави МВР, Министерството остварило 75,90 отсто исполнетост на индикаторите за отвореност, што претставува подобрување во споредба со претходното мерење, кога резултатот изнесувал 73,3 отсто.
Со овој резултат, МВР се наоѓа на второто место меѓу министерствата опфатени со истражувањето.
Особено високи оценки Министерството добило во областите на интегритетот и ефикасноста.
Во категоријата интегритет е забележана целосна исполнетост на индикаторите, односно 100 отсто. Оваа област ги опфаќа механизмите за етичко однесување, спречување судир на интереси и институционална одговорност.
Ист резултат од 100 отсто е постигнат и кај четирите оценувани индикатори за ефикасност, кои се однесуваат на стратегиското планирање, известувањето и следењето на институционалното работење.
Во делот на транспарентноста, МВР остварило 72,46 отсто исполнетост на индикаторите, со што се вбројува меѓу министерствата со повисоки резултати во оваа категорија.
Од Министерството оценуваат дека резултатите претставуваат потврда за напорите за подобрување на отвореноста, отчетноста и достапноста на информациите за граѓаните.
Истовремено, нагласуваат дека постигнатите резултати се дополнителен поттик за унапредување на институционалната транспарентност и комуникацијата со јавноста.
Според МВР, борбата против криминалот и корупцијата не подразбира само ефикасно полициско постапување, туку и одговорно, чесно и транспарентно работење на самата институција.
Од Министерството порачуваат дека ќе продолжат со активностите за зајакнување на довербата на граѓаните, нагласувајќи дека отвореноста и транспарентноста не се само формални стандарди, туку секојдневна обврска на институциите кон јавноста.
