АМСМ ПРЕДУПРЕДУВА Опасност од одрони на повеќе патни правци, изменет сообраќаен режим на неколку делници

Сообраќајот на државните патишта низ Македонија се одвива непречено, по наместа влажни коловози, информира Автомото сојузот на Македонија (АМСМ).

Интензитетот на сообраќајот надвор од градските средини е умерен, а на граничните премини од македонска страна засега нема подолги задржувања за влез и излез од државата.

ВНИМАНИЕ: Опасност од одрони на четири патни правци

АМСМ апелира до возачите да ја приспособат брзината на движење според условите на патот, да ја почитуваат поставената сообраќајна сигнализација и да бидат особено внимателни при возење низ котлините, речните долини и клисурите, каде што постои опасност од одрони.

Посебна претпазливост се препорачува на делниците:

• Катланово – Велес

• Маврово – Дебар – Струга

• Виница – Берово

• Кочани – Делчево

Градежни работи и изменет режим на сообраќај

Поради градежни активности, на повеќе патни правци низ државата се применува времен режим на сообраќај.

Гостивар – Кичево: Од 30 септември се изведуваат градежни работи на државниот пат А2, на мостот број 63 на реката Тајмишка. Времениот режим ќе важи до завршувањето на санацијата.

Струга – Дебар: Од 29 септември е воведен времен режим на регионалниот пат Р1201 поради реконструкција на инјекционата завеса на браната „Глобочица“. Измените ќе важат до завршувањето на активностите.

Гевгелија – ГП Богородица: Од 24 септември 2026 до 15 април 2027 година е воспоставен времен режим на автопатот А1. Делницата од исклучувањето за Гевгелија до граничниот премин Богородица е затворена, а сообраќајот е пренасочен на спротивната коловозна лента, каде што возилата се движат во двете насоки. Изменет режим важи и на клучката кај Гевгелија.

Граничен премин Делчево: Поради реконструкција, од 9 септември е воведен времен режим на сообраќај. Преминот продолжува да функционира непрекинато за време на градежните работи.

Штип: На регионалниот пат Р1204, поради санација на мостот на реката Брегалница, од 6 јули е воспоставен изменет режим на сообраќај, кој ќе трае до завршувањето на работите.

Косоврасти – Мелнички Мост: Продолжуваат градежните активности за санација на свлечиште на регионалниот пат Р1202, поради што е во сила времен режим на сообраќај.

Прилеп – Битола: Поради изградбата на Коридорот 10Д, сообраќајот на делницата од клучката Лагово до Тополчани е пренасочен по регионалниот пат Прилеп – Битола.

Прилеп – Крушево – Сладуево: Поради санација на оштетувања и слегнувања на коловозот на регионалниот пат Р1306, целосно е затворена делницата од Мало Коњари до Кривогаштани. Возилата се пренасочуваат по алтернативен пат, согласно поставената сигнализација.

ГП Блаце – Скопје: На неколку делници се изведуваат градежни активности, а сообраќајот се одвива според одобрен времен режим.

Кичево – Охрид: Поради градежни работи на повеќе делници, сообраќајот се одвива со девијации. Возачите се повикуваат строго да ја почитуваат сигнализацијата и да ја приспособат брзината.

Патот преку Галичица отворен за возила до 3,5 тони

Патниот правец Охрид – Ресен преку Националниот парк „Галичица“ е отворен за сообраќај за сите видови возила со тежина до 3,5 тони, согласно сезонскиот режим што започна на 15 април.

Од АМСМ повторно апелираат на внимателно управување со возилата, особено на влажните коловози и на делниците каде што се изведуваат градежни работи.