ТРАМП ЈА ЗАПАЛИ ИРСКА Би сакал да ја видам обединета – на крајот ќе се случи

Американскиот претседател Доналд Трамп денеска пристигна во Ирска, каде што во рамките на посетата се сретна со ирскиот премиер Мајкл Мартин и други ирски претставници, а најавено е и неговото присуство на турнирот „Irish Open“ на неговото голф-игралиште во Данбег.

Посетата на Трамп е проследена со една од најголемите безбедносни операции што досега ги спровела ирската полиција. Дополнителни безбедносни мерки се преземени во Даблин, Данбег и околината на аеродромот Шенон, каде што беа најавени и протести против американскиот претседател.

Во текот на посетата, Трамп даде и политички интересна изјава за иднината на Ирска, велејќи дека би сакал да види обединета Ирска и дека верува оти тоа „на крајот ќе се случи“.

„Не сакам да предизвикувам проблеми, но ќе ви кажам дека би сакал да ја видам обединета. Имам пријатели од двете страни, одлични луѓе. Мислам дека би било голем успех за сите ако се случи. На крајот ќе се случи“, изјави Трамп во Даблин, пренесува „Гардијан“.

Тој додаде дека обединувањето, според него, би можело да се случи и во блиска иднина.

„Разговараме за тоа и го имате вистинскиот човек тука за да го започнете. Секако, Обединетото Кралство ќе има што да каже за тоа. Но, мислам дека би било одлично. Како тоа може да биде лошо?“, рече американскиот претседател.

Ирскиот премиер Мартин пред посетата изјави дека со Трамп ќе разговара за низа прашања од заеднички интерес, како и за економските, културните и меѓучовечките врски меѓу Ирска и САД.

Република Ирска е независна држава и членка на Европската Унија, додека Северна Ирска е составен дел од Обединетото Кралство. Прашањето за евентуално обединување на островот е едно од најчувствителните политички прашања во регионот.

Посетата на Трамп, воедно, предизвика реакции и протести во повеќе делови од земјата, вклучително и во Даблин, Данбег и кај аеродромот Шенон.