МАКЕДОНИЈА ЈА РАСТУРИ АВСТРИЈА ВО ВИЕНА Димитријевиќ со трипл-дабл, „црвено-жолтите“ славеа со 91:59
Македонија фуриозно го отвори натпреварот, доминираше во текот на сите 40 минути и со убедлив триумф го започна вториот циклус од претквалификациите за Евробаскет 2029.
Македонската кошаркарска репрезентација со убедлива победа го започна вториот циклус од претквалификациите за пласман на Европското првенство во 2029 година.
„Црвено-жолтите“ славеа на гостувањето во Виена против Австрија со 91:59, во натпревар во кој од самиот почеток ја презедоа контролата и не му дозволија на противникот да се врати во игра.
Македонија одлично го отвори натпреварот и по првата четвртина имаше убедлива предност од 30:14. До полувремето разликата порасна на 19 поени (49:30), додека по третата четвртина резултатот беше 65:44.
Најефикасен во македонскиот состав беше Виктор Ефремовски, кој постигна 17 поени. Капитенот Ненад Димитријевиќ одигра фантастичен натпревар и оствари трипл-дабл со 15 поени, 14 скока и 11 асистенции.
Одличен настап имаше и новајлијата Мозес Рајт, кој придонесе со 12 поени и девет скока и беше на само еден скок од дабл-дабл. Мекиќ исто така постигна 12 поени.
Со оваа победа Македонија го запиша првиот триумф во вториот претквалификациски циклус и моментално има учинок 1-0, исто како и Кипар. Австрија, пак, веќе има два порази.
Само првопласираната репрезентација во групата Ф ќе обезбеди пласман во квалификациите за Европското првенство.
Следниот предизвик за Македонија е на 26 ноември, кога во Скопје ќе го пречека Кипар во директен дуел за врвот на табелата.
