ПЕТРОВА УДРИ ПО СКОПЈЕ Нема политичка волја, само губите време на патот кон ЕУ

Бугарската министерка за надворешни работи Велислава Петрова оценува дека во Скопје во моментов нема доволно политичка волја за исполнување на обврските што произлегуваат од европскиот компромис постигнат во 2022 година.

Во интервју за бугарскиот дневен весник „Стандард“, Петрова вели дека токму исполнувањето на договореното е клучно за напредок во односите меѓу двете земји и за продолжување на европската интеграција на Македонија.

Таа потсетува дека во 2022 година била дел од бугарскиот тим што ја застапувал позицијата на Софија пред Европската Унија и оценува дека Бугарија тогаш успеала да ги убеди европските партнери да го прифатат нејзиниот став. Според Петрова, европскиот компромис од 2022 година претставувал значаен успех за Бугарија, особено поради постигнатиот меѓуинституционален консензус во земјата.

„Европскиот компромис од 2022 година беше огромен успех бидејќи беше поткрепен со категоричен меѓуинституционален консензус во Бугарија“, изјавила Петрова.

Таа додава дека постигнувањето на таков консензус било тешко, но токму затоа договореното добило дополнителна тежина.

Софија: Не бараме нови услови

Бугарската министерка тврди дека Софија не поставува нови услови пред Македонија и дека од Скопје се очекува единствено исполнување на она што веќе е договорено во рамките на европскиот компромис. Петрова смета дека довербата меѓу Македонија и Бугарија може да се обнови само преку исполнување на преземените обврски и преку конструктивен пристап кон отворените прашања.

Во тој контекст, таа ја критикува актуелната реторика во односите меѓу двете земји, оценувајќи дека конфронтацијата и антибугарските пораки не придонесуваат за забрзување на европскиот пат на Македонија. Напротив, според неа, таквиот пристап само создава нови тензии и резултира со губење драгоцено време на патот кон Европската Унија.

Споменат и случајот со Ива Михајлова

Во интервјуто Петрова се осврнува и на случајот со Ива Михајлова, оценувајќи го односот на македонските власти како причина за дополнителна загриженост во Софија. Според неа, начинот на кој македонските институции постапиле во овој случај не остава многу простор за оптимизам дека во блиска иднина може да се очекува посериозен напредок во односите меѓу Скопје и Софија.

Петрова, сепак, порачува дека решението, според бугарската страна, останува во исполнувањето на веќе преземените обврски и враќањето на конструктивниот дијалог меѓу двете земји.