ЧЕФЕРИН МУ ОБЈАВИ ВОЈНА НА ИНФАНТИНО Ако се кандидира, ќе има противник

Претседателот на УЕФА, Александар Чеферин, остро го критикуваше планот на претседателот на ФИФА, Џани Инфантино, за продажба на акции поврзани со Светското првенство, оценувајќи дека идејата е „уште полоша од Суперлигата“.

Во интервју за поткастот „Остатокот е политика: Водење“, Чеферин порача дека ваквиот проект би значел комерцијализација на спортот кој, според него, им припаѓа на сите.

„Мислам дека овој план е уште полош од Суперлигата. Во првиот случај, исклучително важни клубови сакаа да основаат своја лига, што беше погрешно и можеше да го уништи фудбалот. Но, овде фудбалот буквално би се продавал“, изјави Чеферин.

Тој додаде дека најважно е што бил спречен уште еден обид за продажба на спортот.

„Тешко ми е да замислам какви луѓе би продавале спорт што им припаѓа на сите“, рече претседателот на УЕФА.

Чеферин смета дека можноста ваквиот план повторно да биде активиран е далеку. Според него, тоа можеби би можело да се случи по две децении, но не очекува такво нешто во следните десет години.

„Работиме многу добро со сите. Сигурен сум дека тоа не може да се случи во следните 10 години“, нагласи тој.

Во однос на односите со Инфантино, Чеферин откри дека двајцата немале контакт по избувнувањето на скандалот и оцени дека просторот за маневрирање на првиот човек на ФИФА станува сè помал.

„Не сум разговарал со него, тој не ме контактирал откако се случи ова“, рече Чеферин.

Тој посочи дека Инфантино има две опции – да сфати дека нема доволна поддршка или да се кандидира за нов мандат на изборите во март.

„Не станува збор само за политичка поддршка од оние што гласаат, туку и за поддршка од фудбалската заедница, навивачите, играчите, поранешните играчи и тренерите. Втората опција е да се кандидира на изборите во март, но во тој случај мислам дека ќе има противник. Засега не знам кој ќе биде тоа“, заклучи Чеферин.