УАПСЕН ВО ПУЛА ДОДЕКА СЕ СНИМАЛ ФИЛМ ЗА СЕВЕРЕН ТЕК Украински нуркач осомничен за експлозиите во рацете на германските власти
Неверојатен пресврт во случајот „Северен тек“: Володимир Журављов бил во Хрватска за снимање на холивудски трилер инспириран од саботажата, кога бил приведен по европска потерница.
Украинскиот државјанин Володимир Журављов, кого германските истражители го сомничат дека учествувал во саботажата на гасоводите „Северен тек 1“ и „Северен тек 2“, е уапсен во хрватскиот град Пула врз основа на европска потерница издадена од германските власти. Според германскиот правен портал LTO, апсењето се случило во средата, додека Журављов престојувал во Хрватска поради снимање на филмот „Остров на змиите“, политички трилер инспириран од експлозиите на гасоводите во 2022 година.
Филмот, во режија на Даг Лиман, познат по „Борновиот идентитет“, во кој настапуваат Шон Пен и Адриен Броди, се снима во Хрватска од почетокот на август. Приказната следи таен тим украински нуркачи кои се впуштаат во опасна подводна мисија во услови на ескалација на тензиите меѓу Русија и Украина. По снимањето во Загреб, екипата се преселила на хрватскиот брег, а во последните денови работела во Пула.
Германското федерално обвинителство го сомничи Журављов дека бил дел од група од шест лица, наводно предводена од Серхиј К. Според истрагата, групата во септември 2022 година поставила експлозиви на подводните гасоводи во близина на данскиот остров Борнхолм. Истражителите сметаат дека Журављов, како обучен нуркач, лично учествувал во подводниот дел од операцијата.
Според обвинителството, групата користела изнајмена едрилица, која тргнала од Росток, а за изнајмувањето на пловилото биле употребени лажни документи и посредници. Експлозиите се случиле на 26 септември 2022 година, на длабочина од околу 80 метри, при што биле сериозно оштетени двата гасовода.
Ова не е прв обид Журављов да биде приведен. Германските власти во летото 2024 година се обиделе да го уапсат во Полска, каде што тогаш живеел, но тој успеал да ја премине границата и да замине во Украина. Во есента 2025 година повторно бил уапсен во Полска, но екстрадицијата во Германија не била реализирана, откако полскиот суд почнал да го разгледува случајот и ги преиспитувал правните околности поврзани со статусот на гасоводите во услови на воен конфликт.
Журављов во минатото јавно ги негирал наводите за вмешаност во експлозиите. Кој точно ја наредил саботажата на „Северен тек“ и понатаму не е целосно утврдено. По апсењето во Пула, Журављов треба да биде предмет на постапка за екстрадиција во Германија, каде што германските власти го товарат за предизвикување експлозија, саботажа и уништување објекти.
