СЕ СОЗДАВА НОВА ВОЕНА ОСОВИНА Трамп го поздрави договорот меѓу Турција, Пакистан и Саудиска Арабија
Трите држави се обврзаа на заедничка одбрана – американскиот претседател вели дека ова е „прв важен чекор“ кон обединување на регионот.
Американскиот претседател Доналд Трамп го поздрави потпишувањето на договорот за колективна одбрана меѓу Саудиска Арабија, Турција и Пакистан, оценувајќи го како значаен чекор кон поголемо обединување и зајакнување на безбедноста на Блискиот Исток.
„Многу ми е драго што гледам дека Саудиска Арабија, Турција и Пакистан неодамна, и конечно, го потпишаа заедничкиот одбранбен договор во Мека. Ова покажува како Блискиот Исток се обединува и како земјите конечно ќе можат да се одбранат на позначаен начин“, напиша Трамп на својата мрежа „Truth Social“.
Тој им честиташе на лидерите на трите земји, оценувајќи дека договорот претставува „голем, смел и прв важен чекор“.
Саудиска Арабија, Турција и Пакистан договорот го потпишаа на почетокот на август, со цел зајакнување на меѓусебната одбранбена соработка и колективното одвраќање од евентуална агресија.
Според договорот, вооружен напад врз една од трите држави ќе се смета за напад врз сите потписнички. Документот предвидува и продлабочување на соработката во повеќе области поврзани со одбраната и безбедноста.
Договорот беше потпишан во Саудиска Арабија за време на средбата на саудискиот престолонаследник Мохамед бин Салман, турскиот претседател Реџеп Таип Ердоган и пакистанскиот премиер Шехбаз Шариф.
