ВНИМАНИЕ ВОЗАЧИ Нови сообраќајни ограничувања, еве каде треба да бидете особено внимателни

Сообраќајот на магистралниот пат Струмица – Граничен премин Ново Село од полноќ е целосно во прекин во двата правца поради сообраќајна незгода, информира Автомотосојузот на Македонија (АМСМ).

Инаку, сообраќајот на државните патишта се одвива непречено и по суви коловози, информира АМСМ. Интензитетот на сообраќајот надвор од градските средини е зголемен, додека на граничните премини од македонска страна нема подолги задржувања за влез и излез од државата.

АМСМ апелира до возачите да ја прилагодат брзината, да ја почитуваат поставената сообраќајна сигнализација и внимателно да управуваат со возилата. Особено внимание се препорачува на патиштата низ котлини, речни долини и клисури, каде постои можност од појава на одрони.

На ризик од одрони особено треба да се внимава на делниците Катланово – Велес, Маврово – Дебар – Струга, Виница – Берово и Кочани – Делчево.

ЛЕТЕН РЕЖИМ И ЗАБРАНИ ЗА ТЕШКИ ТОВАРНИ ВОЗИЛА

Патниот правец Охрид – Ресен, преку Националниот парк „Галичица“, од 15 април е отворен за сообраќај за сите видови возила до 3,5 тони.

Во периодот од 1 јули до 31 август е воведен летен режим на сообраќај, со кој се ограничува движењето на тешки товарни возила со вкупна маса над 15 тони на државните патишта.

Забраната важи:

• петок: од 17:00 до 22:00 часот;
• сабота: од 09:00 до 18:00 часот;
• недела: од 09:00 до 22:00 часот.

При екстремно високи температури, забраната се применува и од понеделник до четврток, во периодот од 11:00 до 17:00 часот.

Ограничувањето не се однесува на возила што превезуваат животни, цвеќе, хуманитарна помош, жито и житни култури, леснорасиплива стока, нафта и нафтени деривати, опасни материјали, како и на возила ангажирани за реализација на проекти на државните патишта.

ПОСЕБЕН РЕЖИМ НА СКОПЈЕ – ОХРИД

На магистралниот пат А2, делница Скопје – Охрид – Скопје, со важност до 1 септември, е забрането движењето на тешки товарни возила со вкупна маса над 7,5 тони за време на викендите.

Режимот важи:

• петок: од 15:00 до 22:00 часот;
• сабота: од 07:00 до 12:00 и од 18:00 до 24:00 часот;
• недела: од 07:00 до 22:00 часот.

Посебниот режим е воведен со цел да се намалат сообраќајните метежи кон Охрид, особено на наплатните пунктови, и да се овозможи побрз проток на возилата во туристичката сезона.

РАБОТИ НА ПАТИШТАТА

На повеќе патни правци во земјава се одвиваат градежни активности и санации поради кои е воспоставен времен режим на сообраќај.

Во Штип, од 6 јули 2026 година, има времен режим поради санација на мостот на реката Брегалница на регионалниот пат Р1204, кој ќе трае до завршување на работите.

На А2, делницата Гостивар – Стража, се врши санација на мостовите бр. 4 – Вијадукт на Атанасова Река и бр. 7 – Вијадукт на Дол, поради што е воспоставен времен режим на сообраќај до завршувањето на градежните активности.

Времен режим има и на мостовите на А2 кај село Желино, во двата правци – Скопје–Желино и Желино–Скопје, каде се врши санација.

На автопатот А1, делница Смоквица – Гевгелија, се изведуваат активности за премин на интерконективен гасовод под автопатот „Пријателство“, со поставена соодветна сигнализација.

На скопската обиколница А2 се врши рехабилитација на делница во должина од околу 250 метри, од клучката Волково до клучката Кондово. Затворена е левата сообраќајна лента, а сообраќајот се одвива по средната и десната лента.

Времен режим е воспоставен и на регионалниот пат Р1202 Косоврасти – Мелнички Мост, каде се врши санација на свлечиште.

Во рамки на изградбата на Коридор 10Д, на патниот правец Прилеп – Битола сообраќајот се пренасочува по регионалниот пат во делот од клучката Лагово до Тополчани.

АМСМ ги повикува возачите да возат внимателно, особено на делниците каде има активни градежни работи и воспоставен времен режим на сообраќај.