РЕАЛ МАДРИД ИСПРАТИЛ ПОНУДА Но Шпанецот никогаш не одговорил

Родри повторно е во центарот на вниманието на шпанската јавност, откако се појавија нови детали за трансфер-сагата во која беа вклучени Реал Мадрид и Барселона. Според информациите од Шпанија, Реал Мадрид покажал сериозен интерес за ангажман на шпанскиот репрезентативец, но самиот Родри наводно никогаш не ја разгледувал сериозно можноста кариерата да ја продолжи на „Сантијаго Бернабеу“.

Иако „кралевите“ направиле конкретен чекор и испратиле понуда до фудбалерот, одговор од неговиот табор, според овие тврдења, не пристигнал. Причината, наводно, била јасна и Родри од самиот почеток имал поинаква желба. Негова приоритетна дестинација била Барселона.

Интересот на Реал Мадрид, пак, дополнително ја раздвижил ситуацијата. Според шпанските извори, целата приказна околу интересот на „кралскиот клуб“ можела да послужи како дополнителен притисок врз Барселона да реагира побрзо и посериозно во трката за потписот на играчот.

СÈ ЗАПОЧНАЛО ПО ФИНАЛЕТО НА СВЕТСКОТО ПРВЕНСТВО

Операцијата за доведување на Родри во Барселона, според информациите, започнала веднаш по финалето на Светското првенство во САД. На големиот натпревар биле присутни Жоан Лапорта, Деко и Алехандро Ечеварија, кои го гледале Родри како капитен на Шпанија го подига трофејот, откако претходно бил прогласен за најдобар играч на финалето.

Во Барселона биле свесни дека Реал Мадрид веќе направил сериозен напредок во обидот да го ангажира фудбалерот. „Кралевите“ барале врвен играч за средниот ред, но Родри не сакал да носи избрзана одлука. Шпанецот имал желба да се врати во Ла Лига, а и Реал Мадрид и Барселона ги сметал за големи и атрактивни дестинации. Сепак, наводно проценил дека стилот на игра кој го практикува тимот на Ханси Флик повеќе одговара на неговите карактеристики.

Деко во меѓувреме продолжил да работи во сенка, обидувајќи се да го убеди Родри дека Барселона е вистинската средина за продолжување на неговата кариера. Каталонскиот клуб, сепак, не сакал да започне конкретни преговори со Манчестер Сити без претходно да добие јасен сигнал од самиот фудбалер.

Според последните информации, тој сигнал конечно пристигнал. Сега Барселона и Манчестер Сити наводно се во одлучувачка фаза од преговорите, а каталонскиот гигант работи на финансиска формула со која би можел да го реализира еден од најголемите трансфери во летниот преоден рок.

Доколку договорот биде финализиран, Родри би го избрал „Камп Ноу“ наместо „Сантијаго Бернабеу“, исход што би претставувал сериозен удар за Реал Мадрид.

НАЈАВА ОД МАДРИД Флорентино Перез го сака Родри, Реал подготвува договор до 2030 година