ТРАМП СО ПОРАКА ДО ИРАН Не сте подготвени за договор, но многу наскоро ќе бидете – САД издадоа глобално предупредување

Американскиот претседател Доналд Трамп изјави дека Иран сè уште не е подготвен да постигне договор со САД, но дека очекува тоа да се случи „многу наскоро“. Говорејќи пред свои поддржувачи во Мариета, во американската сојузна држава Џорџија, Трамп оцени дека Техеран сака договор, но дека постојано поставува нови барања и се обидува да ги менува претходно договорените услови.

„Тие не се подготвени да склучат договор. Секогаш кога ќе постигнеме договор, тие сакаат да го променат него и сè друго. Но, тие многу наскоро ќе бидат подготвени“, изјави Трамп, пренесува CBS News.

Тој се осврна и на Хормутскиот теснец, нагласувајќи дека САД не зависат од оваа стратешки важна поморска рута, бидејќи се меѓу најголемите производители на нафта во светот.

„Не ни треба Хормутскиот теснец, но го правиме тоа затоа што мораме. Не можеме да дозволиме Иран да има нуклеарно оружје“, рече американскиот претседател.

Иако САД располагаат со големо домашно производство на нафта, нестабилноста во регионот на Персискиот Залив продолжува да влијае врз глобалните цени на енергенсите. Хормутскиот теснец е од особено значење за светското снабдување со нафта, бидејќи преку него се транспортира значителен дел од глобалните енергетски резерви.

Во меѓувреме, американскиот Стејт департмент издаде глобално безбедносно предупредување за зголемените ризици поврзани со тензиите на Блискиот Исток. Во соопштението се оценува дека ситуацијата е сложена и дека постои можност за непредвидена ескалација.

На американските граѓани кои се наоѓаат во регионот им е препорачано да бидат особено внимателни и да бидат подготвени за можни нарушувања во патувањето, вклучително и откажувања на летови и привремено затворање на воздушниот простор. Стејт департментот соопшти и дека дел од авиокомпаниите во регионот го одложиле обновувањето на редовните линии, додека други откажале одредени летови.

Американските власти предупредија дека дипломатски објекти на САД, вклучително и надвор од Блискиот Исток, биле цел на напади. Според предупредувањето, Иран и групи поддржани од Техеран би можеле да претставуваат закана за американските интереси во странство, како и за локации поврзани со американски граѓани, компании и институции.

На Американците кои се наоѓаат надвор од регионот им беше советувано внимателно да ги разгледаат патувањата кон и низ Блискиот Исток, а на оние кои планираат да патуваат им се препорачува навреме да проверат со авиокомпаниите дали има промени во распоредот на летовите. Патниците чии летови се погодени од најновите промени се советуваат директно да ги контактираат авиопревозниците за дополнителни информации.