ХАЛАНД ПРОТИВ КЕЈН, МЕСИ СО НОВА МИСИЈА Вечерва паѓа одлуката кој оди во полуфинале на Мундијалот

Вечерва ќе биде комплетирана полуфиналната слика на Светското првенство 2026, откако ќе се одиграат преостанатите два четвртфинални натпревари. Шпанија и Франција веќе обезбедија место меѓу четирите најдобри, а сега се очекува да ги дознаат и своите потенцијални ривали.

Во првиот натпревар, кој започнува во 23:00 часот, силите ќе ги одмерат Англија и Норвешка. Англичаните влегуваат како фаворити, но Норвежаните веќе покажаа дека можат да ги изненадат најсилните, откако во претходната рунда го елиминираа Бразил. Во центарот на вниманието ќе биде дуелот меѓу двајцата врвни голгетери Хари Кејн и Ерлинг Халанд.

Двете селекции досега имаат по четири победи на турнирот. Англија ремизираше само со Гана, додека единствениот пораз на Норвешка беше против Франција. Норвежаните постигнаа 12 голови на шампионатот, а Англичаните 11, што најавува уште еден натпревар со многу возбудувања.

Капитенот на Англија, Хари Кејн, истакна дека ова Светско првенство е едно од најатрактивните кога станува збор за напаѓачите.

„Ова е фантастичен турнир за голгетерите. Навивачите уживаат во головите, но мојата најголема цел не е Златната копачка, туку титулата светски шампион со Англија“, изјави Кејн.

Во трката за најдобар стрелец водат Килијан Мбапе и Лионел Меси со по осум погодоци, Халанд има седум, а Кејн шест.

Селекторот на Норвешка, Стале Солбакен, смета дека неговата репрезентација има реални шанси да направи уште едно изненадување.

„Англија е фаворит, но не огромен фаворит. Притисокот е повеќе на нивна страна. Кејн е нивниот најважен играч, а кај нас Халанд носи разлика, но имаме квалитет и во остатокот од тимот“, изјави Солбакен.

Во вториот четвртфинален натпревар, кој започнува во 03:00 часот по македонско време, актуелниот светски шампион Аргентина ќе се соочи со Швајцарија.

Иако Аргентинците важат за фаворити, нивниот пат до четвртфиналето не беше лесен. Во осминафиналето и во претходната елиминациска рунда со многу мака ги елиминираа Зеленортските Острови и Египет, дури по продолженија и пресврти. Од друга страна, Швајцарија обезбеди место меѓу најдобрите осум откако по изведување пенали ја совлада Колумбија.

Победниците од дуелите Англија – Норвешка и Аргентина – Швајцарија ќе се сретнат во второто полуфинале, додека првата полуфинална двојка веќе е позната – Шпанија против Франција. Со вечерашните натпревари ќе биде комплетирана борбата за светската титула.