БАРСА ПОВТОРНО ЗЕМА МИЛИОНСКИ ЗАЕМ Лапорта ја спаси касата, но долговите не исчезнаа
Барселона повторно се потпира на кредити за да ги покрие трошоците, додека критичарите предупредуваат дека финансиските проблеми сè уште не се целосно решени.
Хоан Лапорта успеа да ја стабилизира Барселона и во одредена мера да ја извлече од тешката финансиска криза во која се најде клубот. Сепак, дел од експертите и навивачите сè уште стравуваат дека некои од потезите на раководството се само привремени решенија, кои можат да создадат нови проблеми во иднина.
Пред три години, Барселона продаде 25 проценти од телевизиските права за период од 25 години на американска инвестициска компанија, а паралелно беа договорени и повеќе кредитни аранжмани со меѓународни банки. Овие финансиски инјекции му овозможија на клубот повторно да биде активен на трансфер-пазарот, да инвестира во реконструкцијата на стадионот и да ја врати конкурентноста.
Сепак, финансиската состојба сè уште не е целосно стабилизирана. Најнов показател за тоа е новиот кредитен аранжман вреден 210 милиони евра.
Според „Мундо Депортиво“, меѓународната агенција „Морнингстар ДБРС“ го потврди кредитниот рејтинг на Барселона, оценувајќи дека тоа ја зголемува довербата во бизнис моделот и финансиската стратегија на клубот. Сепак, агенцијата истовремено го промени статусот на клубот од „позитивен“ во „стабилен“, како главна причина наведувајќи го отворањето на две нови кредитни линии.
Првата транша од заемот, во износ од 105 милиони евра, треба да биде достапна овој месец, додека втората се очекува во ноември. Според шпанските медиуми, средствата се наменети за зајакнување на финансиската позиција на клубот во тековниот преоден рок.
Како гаранција за кредитот, Барселона повторно ги заложила идните приходи од телевизиските права. Дел од првата финансиска инјекција треба да биде искористен за исплата на обврските кон Атлетико Мадрид за Хулијан Алварез и кон Борусија Дортмунд за Карим Адејеми, а дел од средствата ќе бидат насочени и кон исплата на обврските кон вработените.
Иако Лапорта успеа да го врати клубот во борба за трофеи, прашањето останува дали финансиската стратегија на Барселона е долгорочно одржлива или само го одложува решавањето на најголемите проблеми.
