АМСМ СО ВАЖНО ПРЕДУПРЕДУВАЊЕ Ако патувате денес, на овие делници возете особено внимателно

Сообраќајот на сите државни патишта утрово се одвива непречено и по суви коловози, информира АМСМ.

Интензитетот на сообраќајот надвор од градските средини е умерен, а на граничните премини од македонска страна нема подолги задржувања ниту за влез, ниту за излез од државата.

Возачите сепак се повикуваат на зголемена внимателност, особено на патиштата што минуваат низ клисури, речни долини и котлини, каде поради високите температури и природните услови е можна појава на одрони. Посебна претпазливост се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен преку Националниот парк Галичица е отворен за сите возила до 3,5 тони.

Летни забрани за тешки товарни возила

До 31 август е во сила летниот режим на сообраќај, со кој се забранува движење на тешки товарни возила над 15 тони во следните термини:

• петок: од 17:00 до 22:00 часот;
• сабота: од 09:00 до 18:00 часот;
• недела: од 09:00 до 22:00 часот.

Во денови со екстремно високи температури, по одлука на Министерството за здравство, ограничувањето ќе важи и од понеделник до четврток, во периодот од 11:00 до 17:00 часот.

Дополнително, на магистралниот пат А2 Скопје – Охрид за време на викендите е забрането движење на товарни возила над 7,5 тони, со цел да се овозможи побрз проток на туристичкиот сообраќај кон Охрид.

Активни работи на повеќе патни правци

Во тек се градежни активности и времен режим на сообраќај на повеќе локации низ државата, меѓу кои:

• санација на мостот на реката Брегалница на регионалниот пат Р1204 кај Штип;
• реконструкција на мостови на автопатот А2 на делницата Гостивар – Стража;
• санација на мостовите кај Желино на автопатот А2;
• работи на интерконективниот гасовод на делницата Смоквица – Гевгелија;
• рехабилитација на скопската обиколница помеѓу клучките Волково и Кондово;
• санација на свлечиште на регионалниот пат Косоврасти – Мелнички Мост;
• времен режим на сообраќај на патниот правец Прилеп – Битола поради изградбата на Коридорот 10Д.

АМСМ апелира сите учесници во сообраќајот да ја почитуваат поставената сигнализација, да ја прилагодат брзината кон условите на патот и да возат внимателно на делниците каде се изведуваат градежни работи.