НИКОЈ, ПА НИ ИНФАНТИНО, НЕ МОЖЕ ДА ВЛИЈАЕ НА СУДИИТЕ Колина проговори за најголемите ВАР-контроверзии на Мундијалот
Првиот човек за судење во ФИФА ги отфрли сите обвинувања за влијание врз арбитрите и ги објасни најспорните ВАР-одлуки на Светското првенство.
Светското првенство влезе во својата завршница, но покрај фудбалските возбудувања, во центарот на вниманието сè почесто се судиските одлуки, ВАР-технологијата и критиките кон ФИФА. По серијата контроверзни ситуации, првиот човек на судиската комисија на ФИФА, Пјерлуиџи Колина, јавно ги отфрли обвинувањата дека судиите работат под какво било влијание.
Контроверзиите започнаа со поништениот гол на Хрватска против Португалија, кога ВАР регистрираше минимален контакт од страна на Игор Матановиќ. Дополнително внимание предизвика и случајот со Фоларин Балогун, кој по црвен картон доби автоматска суспензија пред осминафиналниот натпревар меѓу САД и Белгија.
Најбурни реакции, сепак, следуваа по дуелот меѓу Аргентина и Египет. Египетската репрезентација жестоко протестираше поради поништениот гол на Мостафа Зика, како и поради недосудениот прекршок врз Мохамед Салах во завршницата, непосредно пред победничкиот погодок на Аргентина.
Во интервју за официјалната интернет-страница на ФИФА, Колина оцени дека, и покрај бројните дебати, судиската организација успешно го води турнирот.
„Севкупно, сме задоволни. Одигравме 50 проценти повеќе натпревари отколку на Светското првенство во Катар во 2022 година, а пред нас се уште има осум големи натпревари. Со толку многу натпревари во релативно краток временски период, нормално е некои работи да не одат како што се очекува“, изјави Колина.
Тој нагласи дека дебатата околу судиските одлуки е составен дел од фудбалот, но предупреди дека обвинувањата за нечесност можат да имаат сериозни последици.
„Конструктивните дискусии за одлуките секогаш ќе бидат дел од фудбалот, но неоснованите обвинувања немаат место во нашиот спорт. Никој не може да го доведе во прашање интегритетот на службените лица на Светското првенство. Кога тоа ќе се случи, може да предизвика реакции што водат до закани против нив и нивните семејства. Тоа не е во ред“, порача тој.
Колина категорично ги отфрли и шпекулациите дека судиите се изложени на влијание од раководството на ФИФА.
„Никој не може да тврди дека судењето на ФИФА може да биде под влијание на никого, дури ни претседателот на ФИФА, Џани Инфантино. Тој отсекогаш покажувал целосна поддршка за судискиот тим и верува дека работиме независно. Судиите носат фер одлуки и, исто како играчите и тренерите, секогаш се обидуваат да го дадат својот максимум“, истакна Колина.
Осврнувајќи се на натпреварот Аргентина – Египет, тој детално ја објасни улогата на ВАР при проверката на головите.
„По секој постигнат гол, ВАР ја проверува целата напаѓачка фаза на поседување на топката. Ако се утврди прекршок што имал влијание врз голот, ВАР ќе препорача судијата да ја прегледа снимката. Не постои временско или просторно ограничување за тоа колку далеку може да се врати проверката“, објасни Колина.
Како пример ја посочи ситуацијата во која Марван Атија го нагазил Лисандро Мартинез.
„Египетскиот број 19, Марван Атија, јасно стапна на ногата на аргентинскиот број 6, Лисандро Мартинез. За нас тоа е прекршок. Доколку судијата не го забележи на теренот, ВАР има право да интервенира“, рече тој.
Во однос на протестите на Египет за контактот врз Мохамед Салах пред победничкиот гол на Аргентина, Колина нагласи дека судискиот тим правилно проценил оти станува збор за дозволен дуел.
„Ако не се утврди прекршок во подготовката на акцијата, ВАР само го информира судијата. Стапнувањето на ногата на противникот е прекршок, но кога дефанзивецот најпрво ја игра топката, а потоа доаѓа до нормален фудбалски контакт, нема основа за фаул“, објасни тој.
Иако призна дека кај одредени ситуации секогаш ќе постои простор за различни толкувања, Колина потенцираше дека ФИФА е задоволна од начинот на кој судиските критериуми биле применувани досега. Неговите објаснувања веројатно нема целосно да ги смират реакциите, бидејќи судењето и ВАР остануваат една од најдискутираните теми на Мундијалот. Сепак, пораката од ФИФА е недвосмислена – судиските одлуки може да бидат предмет на анализа и дебата, но не и на сомнежи дека се носат под притисок или надворешно влијание.
