СВЕТСКО ПРВЕНСТВО ФИНИШИРА Почнува најжешката фаза на турнирот
Канада ја отвора драмата, Мароко чека сензација.
На Светското првенство во САД, Мексико и Канада вечерва (сабота, 4 јули) започнува осминафиналната фаза, која носи нов бран големи пресметки и елиминации. Исто како и во претходната рунда, и оваа фаза ја отвора еден од ко-домаќините Канада. Вечерва од 19:00 часот Канада ќе се соочи со Мароко, додека четири часа подоцна, од 23:00 часот, на терен излегуваат Франција и Парагвај.
Распоред на осминафиналето:
Сабота, 4 јули: Канада – Мароко (19:00), Парагвај – Франција (23:00)
Недела, 5 јули: Бразил – Норвешка (22:00)
Понеделник, 6 јули: Мексико – Англија (02:00) и Португалија – Шпанија (21:00)
Вторник, 7 јули: САД – Белгија (02:00), Аргентина – Египет (18:00) и Швајцарија – Колумбија (22:00)
Драма и изненадувања во осминафиналето
Првата нокаут-фаза понуди вистински фудбалски спектакл, од драми во продолженија и пенал-рулети, до ВАР-одлуки во последните моменти. Канада со гол во судиското продолжение ја елиминираше Јужна Африка, додека Бразил по пресврт ја совлада Јапонија. Најголемите изненадувања ги приредија Парагвај, кој ја исфрли Германија по пенали, и Мароко, кој ја елиминираше Холандија на идентичен начин.
Франција, Англија, Белгија и САД обезбедија пласман во следната фаза, додека Шпанија и Португалија продолжуваат понатаму по драматични натпревари. Аргентина, предводена од Лионел Меси, тесно ја совлада африканската сензација Зеленортски Острови.
Најави за осминафиналето
Осминафиналните дуели ветуваат нова доза возбуда и неизвесност. Канада ќе се обиде да продолжи со историскиот поход против Мароко, додека Парагвај ќе ја бара новата сензација против Франција. Бразил и Норвешка носат класичен судир на стилови, а Мексико ќе се обиде да ја искористи домашната атмосфера против Англија.
Еден од најочекуваните дуели е пиринејската пресметка меѓу Португалија и Шпанија, каде се очекува вистинска тактичка битка. САД ќе се соочат со Белгија пред домашна публика, додека Аргентина ќе се обиде да ја потврди фаворитската улога против Египет.
Осминафиналната програма ја затвора дуелот меѓу Швајцарија и Колумбија во вторник во 22:00 часот.
