НОВИ ЕСКАЛАЦИИ ВО КАШМИР: Најмалку 13 цивили убиени, 59 ранети во пакистански напади врз индиска територија

Најмалку 13 цивили загинаа, а 59 се ранети во најновата ескалација на насилството во спорниот регион Кашмир, откако пакистанските сили извршија артилериски напади врз индиска територија, соопшти индиското Министерство за надворешни работи.

Инцидентот се случил долж „Линијата на контрола“ – демаркациската линија што го дели Кашмир меѓу Индија и Пакистан, каде што, според извештаите, најголем број на жртви имало во село во северозападниот дел на регионот.

Нападите на Пакистан следеле како одговор на претходни индиски воени акции врз пакистанска територија. Тие, пак, биле одмазда за смртоносниот напад што се случи на 22 април, кој индиските власти го припишуваат на милитантни групи со поддршка од Пакистан.

И покрај повиците од меѓународната заедница за воздржаност, судирите меѓу двете нуклеарно вооружени сили продолжуваат да земаат жртви од двете страни. Според последните информации, од пакистанска страна загинале најмалку 31 лице во текот на последните неколку дена на интензивни престрелки.

Ситуацијата дополнително го зголемува ризикот од поширок конфликт во регионот, кој со децении е извор на напнатости меѓу двете земји. Владините претставници од двете страни досега не најавија преговори, а граѓаните долж границата остануваат во состојба на неизвесност и страв.