ВАЖНО ЗА СИТЕ ВОЗАЧИ, ОД ДЕНЕС НОВИ ЗАБРАНИ НА ПАТИШТАТА Проверете пред да тргнете, ова може да ви го промени патувањето

Ако денес планирате да патувате низ Македонија, добро е прво да ги проверите најновите информации од АМСМ. Иако сообраќајот на државните патишта моментално се одвива непречено по претежно суви коловози, од денес стапуваат во сила нови ограничувања кои можат да влијаат на движењето, особено за товарните возила.

На граничните премини засега нема подолги задржувања, а интензитетот на сообраќајот надвор од градските средини е умерен.

Од денес нови забрани за камионите

Со почетокот на јули започнува летниот режим на сообраќај, кој ќе важи до 31 август. Во тој период тешките товарни возила со маса над 15 тони нема да смеат да сообраќаат во одредени термини за време на викендите, а ограничувања ќе има и во денови со екстремно високи температури.

Дополнително, на магистралниот пат Скопје – Охрид и ова лето останува на сила посебен режим за товарни возила над 7,5 тони, со цел да се избегнат големи метежи кон туристичките дестинации.

Внимание – на овие делници има опасност од одрони

АМСМ предупредува дека е неопходна зголемена претпазливост на патиштата низ клисурите и речните долини, каде е можна појава на одрони. Најризични се делниците:

• Катланово – Велес,
• Маврово – Дебар – Струга,
• Виница – Берово,
• Кочани – Делчево.

Возачите се повикуваат да ја прилагодат брзината и строго да ја почитуваат поставената сигнализација.

Работи на патишта низ целата држава

И понатаму се изведуваат градежни активности на повеќе патни правци. Времен режим на сообраќај има на делниците Гостивар – Стража, мостовите кај Желино, Смоквица – Гевгелија, скопската обиколница, Косоврасти – Мелнички Мост, Прилеп – Битола, како и на автопатската делница Кичево – Охрид, каде сообраќајот се одвива по девијации.

Поради тоа, на овие локации може да се очекува побавно движење на возилата.

Добра вест за туристите

Патниот правец Охрид – Ресен преку Националниот парк Галичица останува отворен за сите возила до 3,5 тони, што ќе го олесни патувањето кон туристичките центри.

АМСМ им препорачува на сите возачи пред поаѓање да ги проверат најновите информации за состојбата на патиштата, да бидат трпеливи на местата каде се изведуваат градежни работи и да возат внимателно, особено на делниците каде постои опасност од одрони.