ПОЧНА БИТКАТА ЗА УПИС ВО СРЕДНО Над 25.000 места, но роковите се кратки
Пријавувањето се одвива електронски преку Uslugi.gov.mk и schools.mk
Започна првиот уписен рок за запишување ученици во прва година во средно образование за учебната 2026/2027 година.
Полуматурантите се пријавуваат електронски преку порталот Uslugi.gov.mk, со најава преку корисничките сметки на schools.mk. По електронската пријава, кандидатите треба да ја достават потребната документација во училиштата каде што конкурираат.
Во текот на јуни се предвидени две електронски пријавувања. Првото трае од 12 јуни во 00:00 часот до 15 јуни во 23:59 часот, додека второто е закажано за 23 јуни. Во августовскиот рок ќе има едно пријавување, на 20 август.
Според конкурсот на Министерството за образование и наука, обезбедени се над 25.000 слободни места во 109 јавни средни училишта низ државата. Од нив, повеќе од 17.000 се за стручно образование, околу 6.000 за гимназиско и 570 места за уметничко образование.
