ТРГНУВАТЕ НА ПАТ Еве каде ве чекаат застои и изменет сообраќаен режим

Денеска (09.06) сообраќајот на државните патишта низ земјава се одвива непречено по суви коловози, информираат од Автомото сојузот на Македонија (АМСМ). Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.

Од АМСМ апелираат до возачите да ја прилагодат брзината на условите на патот, да ја почитуваат сообраќајната сигнализација и внимателно да управуваат со возилата, особено на делниците низ клисури, речни долини и котлини каде постои опасност од одрони. Најризични се патните правци Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен преку Националниот парк Галичица од 15 април е повторно отворен за сите возила со маса до 3,5 тони.

Во меѓувреме, на повеќе патни правци низ државата се изведуваат градежни активности и санации на мостови и свлечишта, поради што е воведен времен режим на сообраќај. Работи се изведуваат на автопатот А2 на делницата Гостивар – Стража, на мостовите кај Желино, на автопатот Смоквица – Гевгелија, на скопската обиколница меѓу Волково и Кондово, како и на регионалниот пат Косоврасти – Мелнички Мост.

Поради изградбата на Коридорот 10Д, во сила е и времен режим на сообраќај на патниот правец Прилеп – Битола, при што движењето на возилата се пренасочува по регионалниот пат од клучката Лагово до Тополчани.

Возачите се повикуваат да ја следат поставената сигнализација и навремено да се информираат за состојбата на патиштата пред поаѓање.