ОДИТЕ ПО ПАСОШ – Не може како на плажа, МВР бара соодветно облекување
Министерството апелира посетителите и вработените да се придржуваат до општоприфатените норми за облекување во јавни институции.
Министерството за внатрешни работи соопшти дека воведува Кодекс за облекување за сите вработени и граѓани кои ги посетуваат просториите на Одделот за граѓански работи, со цел зачувување на професионалниот стандард, достоинството на институцијата и меѓусебната почит.
Од МВР велат дека како институција која секојдневно им служи на граѓаните, сметаат дека соодветното облекување придонесува за подобра работна атмосфера и поголемо почитување на државните институции.
Воедно, апелираат до граѓаните кои доаѓаат за подигнување лични документи, пасоши или други административни услуги, да водат сметка нивниот изглед да биде во согласност со општоприфатените правила за јавни установи.
Од Министерството додаваат дека и вработените во Одделот за граѓански работи ќе имаат обврска доследно да го почитуваат утврдениот кодекс за облекување.