НОВАТА ВЛАСТ ТРГНА ВО ДИРЕКТЕН СУДИР СО ПРЕТСЕДАТЕЛОТ – Мора да си одите

Унгарскиот претседател Тамаш Суљок ги отфрли барањата за негова оставка, истакнувајќи во интервју дека не постои правна или уставна основа за таков чекор.

Политичките тензии во Унгарија се засилија по победата на партијата TISA на априлските избори, со што заврши 16-годишното владеење на Фидес на Виктор Орбан. Новата власт најави реформи насочени кон владеењето на правото и односите со Европската Унија.

Лидерот на TISA, Петер Маѓар, изјави дека резултатите претставуваат „глас за промена на режимот“ и побара повлекување на Суљок и други високи функционери, тврдејќи дека тие се поврзани со претходната власт.

Суљок, кој ја извршува претежно церемонијалната функција на претседател, изјави дека останува посветен на својот мандат и дека ќе продолжи да ги извршува должностите додека тоа е возможно. Тој додаде дека претседателот треба да биде симбол на национално единство и ги отфрли оценките дека станува збор за „режимска промена“.

Во одговор на неговите изјави, Маѓар порача дека, доколку Суљок не се повлече, новото парламентарно мнозинство може да иницира уставни и законски измени со кои би се овозможило негово отстранување. Тој на социјалните мрежи порача дека Унгарија има потреба од претседател кој не е политички пристрасен и го обвини Суљок дека е дел од „неуспешен систем“.