ЛЕКАРИ ОД СТРАНСТВО ЌЕ ЛЕКУВААТ ВО МАКЕДОНИЈА – Еве како

Министерот за здравство Азир Алиу најави дека телемедицината ќе стане еден од главните столбови за модернизација на здравствениот систем и надминување на хроничниот недостиг на лекари во Северна Македонија.

Тој посочи дека значителен потенцијал лежи во вклучувањето на лекарите од дијаспората, кои се докажани специјалисти и работат во реномирани здравствени системи ширум светот. Според Алиу, целта е овој човечки капитал да се искористи преку современи технолошки решенија, наместо да остане надвор од домашниот систем.

Преку развојот на телемедицината, овие професионалци ќе можат да се вклучат директно или од далечина во дијагностика, консултации и третман на пациенти. Министерот информираше дека веќе остварил комуникација со академски институции и лекари од странство, при што дел од нив изразиле подготвеност да помогнат дури и без финансиски надомест.

Проектот веќе е во почетна фаза, со пилот-примена во Дебар и Делчево, каде што здравствени услуги се обезбедуваат од далечина, со поддршка од медицински тимови во Скопје.

Алиу објасни дека следната фаза ќе се фокусира на воспоставување стандарди и процедури за телемедицина, со цел системот да се прошири и да ги вклучи и лекарите од дијаспората. Во третата фаза се предвидува развој на напредни дигитални алатки, особено во радиологијата, кои ќе овозможат специјалисти од странство да даваат стручни мислења за сложени случаи.

Според министерот, ваквиот пристап не само што ќе го подобри пристапот до здравствени услуги, туку и ќе создаде одржлива и долгорочна соработка со медицинските професионалци од дијаспората.7