ЦЕНИТЕ НА НАФТАТА ЌЕ СЕ СРУШАТ – САД најавуваат пресврт на пазарот

Претставници од САД изразуваат оптимизам дека цените на енергенсите во блиска иднина би можеле да почнат да се намалуваат, поради стабилизирање на глобалните пазари и намалување на геополитичките тензии.

Според нивните проценки, зголеменото производство на нафта и гас, како и подобрените логистички услови, ќе доведат до поголема понуда на светскиот пазар. Тоа би можело да создаде притисок за намалување на цените, по неодамнешните нагли поскапувања.

Директорот на Националниот економски совет на САД, Кевин Хасет, изјави дека администрацијата на претседателот Доналд Трамп сè уште се соочува со инфлациски предизвици, но очекува цените на енергенсите да почнат да паѓаат.

Тој нагласи дека клучен фактор е нормализацијата на сообраќајот низ Ормутскиот теснец, една од најважните светски рути за транспорт на нафта.

„Бродовите во моментов минуваат низ теснецот, но со околу 10 проценти од вообичаената брзина. Кога ќе се врати нормалната динамика, очекуваме стабилизација на пазарите“, изјави Хасет.

Според него, забавениот транспорт директно влијае врз понудата и цените, па подобрувањето на протокот би можело да доведе до намалување на ценовниот притисок.

Во меѓувреме, американскиот претседател Доналд Трамп изјави дека голем број празни нафтени танкери се упатуваат кон САД за да се наполнат со, како што рече, „најквалитетна нафта и гас во светот“.

Тој додаде дека САД располагаат со поголеми енергетски резерви од следните две најголеми нафтени економии заедно.

Изјавите доаѓаат во период на силни осцилации на глобалниот нафтен пазар, предизвикани од конфликтите и тензиите меѓу САД, Израел и Иран, како и состојбата во Ормутскиот теснец – клучен поморски коридор за транспорт на енергенси.

Цената на нафтата тип „брент“ оваа недела достигна над 111 долари за барел, по што падна под 92 долари по најавите за привремено примирје и можност за повторно отворање на теснецот.

И покрај падот, цените сè уште се повисоки од периодот пред ескалацијата на конфликтот, кога барелот се тргуваше околу 70 долари.

Затворањето и ограничувањето на протокот низ Ормутскиот теснец, преку кој поминува околу една петтина од светската нафта, предизвика дополнителен притисок врз цените на горивата и храната на глобално ниво.