ПОЧНУВА ЛИ РАСКОЛ – Трамп бара акција, НАТО се повлекува
Се отвора прашањето за границите на обврските и улогата на НАТО во глобални конфликти.
Членките на НАТО немаат обврска да учествуваат во воени акции на САД и Израел против Иран, изјави турскиот министер за трговија Омер Болат, реагирајќи по, како што се наведува, ултиматумот што американскиот претседател Доналд Трамп им го упатил на сојузниците во врска со ситуацијата околу Ормутскиот теснец.
Според извештаите, Трамп го пренел барањето до генералниот секретар на НАТО за време на неговата посета на Вашингтон, каде што се одржале повеќе состаноци, меѓу кои и разговори зад затворени врати со високи американски функционери. Во меѓувреме, се споменува и коалиција од околу четириесет земји, меѓу кои и сојузници од НАТО, како и Јапонија, Јужна Кореја и Австралија, која работела на план за обезбедување на поморските рути по конфликтот.
И покрај краткотрајното примирје, само ограничен број бродови успеале да поминат низ теснецот, што ја одржува напнатата ситуација во регионот. САД, пак, инсистираат на побрзо решение што би вклучувало ангажирање воени и поморски капацитети.
Турскиот министер Болат нагласи дека НАТО има исклучиво одбранбена улога, чија цел е зачувување на мирот и безбедноста, пред сè во Европа, но и пошироко. Тој потврди дека членките имаат право да потсетат оти алијансата не е создадена за учество во офанзивни операции или конфликти.
Во исто време, дел од членките на НАТО, според наводите, ги отфрлаат барањата за директно вклучување во воената кампања против Иран, истакнувајќи дека не биле консултирани и дека не постои обврска за таква интервенција според природата на алијансата.