ИТАЛИЈА БЕЗ СЕЛЕКТОР – Инзаги одбива, Конте се нафаќа за нов селектор
Легенди како Дел Пјеро и Малдини можат да се вклучат во претседателската трка за италијански фудбал.
Тренерот на Ал Хилал, Симоне Инзаги, денес објави дека нема намера да ја преземе селекцијата на Италија, нагласувајќи дека е задоволен од работата во Саудиска Арабија.
Италија моментално е без селектор, откако Џенаро Гатузо поднесе оставка по елиминацијата од Босна и Херцеговина во финалето на плејофот за Светското првенство 2026.
„Да го заменам Гатузо? Поласкан сум, но сум среќен во Саудиска Арабија и сè уште имам уште една година од мојот договор со Ал Хилал“, изјави Инзаги за италијанскиот весник Либерта.
Тој додаде:
„Навистина сум тажен што Италија нема да игра на Светското првенство трет пат по ред. Јас сум 100% Италијанец, мојот брат го освои Светското првенство. Сигурен сум дека италијанскиот фудбал брзо ќе се опорави.“
Инзаги го презеде Ал Хилал во јуни 2025 година и истакна дека ужива во животот во Саудиска Арабија.
„Начинот на живот, спортската и неспортската инфраструктура, како и спокојството што ве придружува и при стресни ситуации, сето тоа е фантастично“, додаде тој.
Пред да дојде во Ал Хилал, Инзаги ги водеше Лацио и Интер, а истакна дека ја ценел можноста за ново искуство и пауза од стресот на врвниот фудбал.
Во меѓувреме, тренерот на Наполи, Антонио Конте, е меѓу најспоменуваните кандидати за нов селектор на Италија. Конте, кој ја водеше националната селекција од 2014 до 2016 година, изјавил дека би можел да ја прифати функцијата, а претседателот на Наполи, Аурелио Де Лаурентис, најверојатно ќе го ослободи за националниот тим.
Локалните медиуми, истовремено, потенцираат дека на претстојните избори за претседател на италијанскиот фудбал, конкуренција на фаворитот Џовани Малаго можат да бидат легенди како Алесандро Дел Пјеро, Паоло Малдини и Деметрио Албертини, кои уживаат силна јавна поддршка.