ИРАН НЕ ПОПУШТА – Русија може да биде посредник, но мирот не е толку лесен

Иран води консултации со неколку пријателски земји, вклучително и со Русија, за можноста за посредништво во конфликтот со САД, но амбасадорот на Исламската Република Иран во Москва, Казем Џалали, предупреди дека само прекин на огнот без цврсти гаранции нема да биде доволен за почеток на преговори.

Во интервју за руската агенција ТАСС, Џалали нагласи дека секои преговори бараат прекин на агресијата, обезбедување безбедносни гаранции и почитување на правата на Иран, како и подготвеност за продолжување на самоодбраната додека заканите не бидат целосно отстранети.

Тој додаде дека Техеран ги поддржува сите конструктивни иницијативи за стабилност во регионот, но дека секој предлог за траен прекин на огнот мора да ги земе предвид реалните услови на теренот и да ги исполни клучните политички и правни барања. Меѓу нив се: целосен крај на агресијата и терористичките акти, сигурни гаранции дека конфликтите нема да се повторуваат, компензирање на материјалната и нематеријалната штета, како и почитување на иранската јурисдикција во Ормутскиот теснец за зачувување на меѓународната поморска безбедност.

Џалали исто така потенцира дека Иран ќе го користи своето право на самоодбрана додека заканите не бидат целосно отстранети и дека редовно разменува мислења со партнерите, вклучително и со Русија, во рамки на дипломатските активности.

Коментирајќи ја изјавата на генералниот директор на Меѓународната агенција за атомска енергија, Рафаел Гроси, за можните преговори меѓу САД и Иран во Исламабад, амбасадорот ја критикуваше администрацијата на американскиот претседател Доналд Трамп, оценувајќи дека „предавството на дипломатијата“ е нејзина карактеристика, и го повика Гроси да се изјасни за нападите врз иранските нуклеарни постројки.