ВОЗАЧИТЕ ОД БИХ БЕСНИ – Европа ги третира како туристи, блокадите започнаа

Утрово во 07:00 часот, транспортерите во Босна и Херцеговина го започнаа најавениот протест со блокада на товарниот сообраќај на неколку гранични премини, најкритично на преминот Свилај каде се формира колона од камиони долга околу 1,5 километри. Иако патничките возила засега минуваат, движењето на стоки е целосно прекинато.

Транспортните компании бараат решение за ограничувањето на престојот на нивните возачи во Шенген зоната, кое им го загрозува опстанокот. „Не можеме да работиме со правила кои не третираат како туристи во Шенген зоната, иако имаме сите потребни лиценци“, истакна Конзорциумот „Логистика БиХ“.

Полицијата, повикувајќи се на одлуки на ентитетските власти, забрани дел од протестите, особено во Република Српска и кантоните Унско-Сана и Западнохерцеговски. Министерството за внатрешни работи на РС соопшти дека нема да дозволи опструкција на границите и нарушување на транспортот на стоки и услуги.

Главниот координатор на „Логистика БиХ“, Велибор Пеулиќ, изјави дека неколку премини, како Свилај, биле блокирани, но на други присуството било оневозможено од полицијата. Преку блокадите транспортерите сакаат да укажат на долгогодишниот проблем со третманот на возачите од БиХ во ЕУ, каде можат да престојуваат максимум 90 дена во период од шест месеци. Надминувањето на овој лимит носи казни и забрана за повторен влез.

Тие исто така бараат поврат на дел од акцизата за гориво, враќање на ДДВ за меѓународен транспорт, забрзување на царинските процедури и намалување на времето на чекање на границите.

Министерството за транспорт и врски на БиХ, кое ја разбира нивната загриженост, истакнува дека дел од барањата зависат од повеќе институции како што се Советот на министри, ентитетските влади, Управата за индиректно оданочување и ЕУ. Министерот Един Форто најави итен состанок со Хрватска за пофлексибилен третман на возачите на шенгенската граница и продолжување на работата за подобрување на условите за транспортниот сектор.