(ВИДЕО) БОГ НА БОГАТСТВОТО – Сопственикот на компанијата дели милиони на персоналот

Кинеската компанија „Henan Kuangshan Crane Co., Ltd.“ предизвика вистинска лавина реакции на социјалните мрежи откако им додели речиси 70% од годишната добивка на своите вработени. Видеата од работниците кои носат купишта банкноти станаа вирални, а сопственикот беше наречен „бог на богатството“.

Компанијата и нејзиниот сопственик Цуи Пејџун исплатија 180 милиони јуани, односно околу 26 милиони американски долари, како годишни бонуси на своите вработени. Спектакуларната распределба се случи на 13 февруари, на големата годишна прослава на компанијата, при што само таа вечер беа поделени над 8,7 милиони долари во готово.

За настанот беа поставени 800 маси за банкет, а присуствуваа околу 7.000 луѓе. Вработените беа повикани на сцената да ги земат своите награди, а преку интерактивни игри сами броеа колку пари ќе задржат. Снимките покажуваат работници кои бројат купишта банкноти на долги маси, додека други носат големи купчиња пари и некои едвај ги држат сите банкноти што им се доделени.

Цуи Пејџун ги изненади и дополнително воодушеви вработените кога се обрати до финансискиот оддел:

„Зошто делиме машини за перење? Дали цените на златото се зголемија? Во претходните години дававме ѓердани и прстени. Донесете пари и дајте им на сите уште 20.000 јуани!“

Неговата спонтана одлука предизвика ентузијазам и во салата, и на интернет. Вкупната годишна исплата на бонуси, вклучувајќи ги и оние поделени преку интернет, надмина 180 милиони јуани. Со оглед на тоа што профитот на компанијата за 2025 година изнесуваше 270 милиони јуани, речиси 70% од добивката беше распределена меѓу вработените.

„Henan Kuangshan Crane Co., Ltd.“ е основана во септември 2002 година, се занимава со производство на кранови и опрема за ракување со материјали и работи во повеќе од 130 земји ширум светот. Цуи Пејџун поседува околу 98,88% од сопственичкиот удел.

Ова не е прв пат компанијата да доделува големи парични награди. Во 2024 година, од нето добивката од 260 милиони јуани, 170 милиони јуани беа распределени на вработените. По повод Меѓународниот ден на жената, речиси 1,6 милиони јуани беа доделени како бонус на 2.000 жени вработени во компанијата.

Поради честите дарежливи исплати, корисниците на социјалните мрежи го нарекоа Цуи „шефот кој најмногу сака да дели пари“.

„Не е дека јас сакам да делам пари. Младите денес имаат кредити за автомобили и станови. Ако можеме барем малку да им го олесниме товарот, тоа многу значи“, изјави тој.

🇨🇳 Za proslavu kineske nove god. Firma “Henan Kuangshan Crane” je postavila protivrednost od 26 miliona US$, i svih 7.000 zaposlenih su pozvani da se posluže.

Svakom po ≈3.715$
Ne znam kako to Kinezi rešavaju, ali kod nas bi bio pun urgentni centar 🤷pic.twitter.com/9r5mJeYYT2

— Vladimir Nikolić (@VladimirZemun) February 26, 2026