НОВА ПРОГРАМА ЗА ДИРЕКТНИ ПЛАЌАЊА – Субвенции само за вистинските земјоделци
Целта на реформите е зголемување на домашното производство на храна и воведување ред во исплатата.
Владата ја усвои новата Програма за директни плаќања за 2026 година, со која се воведуваат значајни промени во системот на субвенционирање на земјоделците. Министерот за земјоделство, Цветан Трипуновски, појасни дека главната цел на реформите е зголемување на домашното производство на храна и воведување поголем ред при исплатата на државната помош.
Една од најзначајните новини е минималното зголемување на површините кои се услов за добивање субвенции. Министерот нагласи дека контролите на терен ќе бидат строго спроведувани за да се спречат досегашните злоупотреби.
„Инспекторите се на располагање на Платежната агенција за да се спречи одлевање на државни средства кај лица кои досега користеле субвенции, а не обработувале земјоделска површина. Дел од производството земјоделците ќе треба да го докажат преку предавање во откупувачките центри“, изјави Трипуновски.
Министерот, исто така, ги отфрли обвинувањата на опозицијата за кратење на средствата, нагласувајќи дека не станува збор за намалување на субвенциите, туку за воведување ред и обезбедување тие да завршуваат кај вистинските земјоделци.
