ТРАМП РАСПОРЕДУВА АРМАДА ЗА НАПАД – Иран ветува „шокантен“ одговор на секоја агресија од САД
Американските сили го засилуваат ракетниот и воздушниот штит за Израел и сојузниците во регионот.
Соединетите Американски Држави распоредуваат дополнителни средства за воздушна одбрана во Израел, како заштита од можни одмаздни акции од Иран, јавува „Волстрит џурнал“, повикувајќи се на анонимни извори.
Според весникот „Њујорк тајмс“, Пентагонот ги засилува капацитетите за воздушна одбрана не само за Израел, туку и за арапските сојузници и американските сили во регионот, во случај на ирански напади. Во истиот текст се наведува дека американските сили би можеле да изведат „ограничени воздушни напади“ врз Иран доколку претседателот Доналд Трамп го нареди тоа.
Иранскиот министер за надворешни работи, Абас Арагчи, изјави дека Техеран внимателно ги следи разузнавачките информации и дека земјата е подготвена да одговори на каква било агресија.
„Нашиот одговор би бил шокантен“, нагласи Арагчи.
Претседателот Трамп претходно објави дека САД распоредуваат „армада“ од бродови близу Иран, поголема од онаа покрај брегот на Венецуела. Тој изрази надеж дека Иран ќе прифати преговори за „фер и праведен“ договор, што би вклучувало целосно откажување од нуклеарното оружје.
САД бараат од Иран целосно запирање на збогатувањето ураниум и ограничување на развојот на балистичките ракети. Техеран изјави дека е подготвен за дијалог, но тој мора да се заснова на принципи на еднаквост и меѓусебно почитување.
Според „Њујорк тајмс“, доколку преговорите не успеат, САД разгледуваат и други опции, вклучувајќи напади врз нуклеарни и ракетни објекти, операции насочени кон раководството на земјата, па дури и можност за удари на иранска територија. Сепак, Трамп сè уште не дал конечна наредба.
Во Пентагон, началникот на Здружениот штаб на американските вооружени сили, Ден Кејн, и началникот на Генералштабот на израелската армија, Ејал Замир, одржаа итен состанок за зголемените тензии со Иран.
Трамп истакна дека нападите врз иранските нуклеарни постројки во јуни 2025 година биле само почеток и предупреди дека следниот удар би бил „уште полош“. Иран возврати дека секоја агресија ќе ја таргетира целата воена инфраструктура на САД и нивните сојузници.
Арагчи повтори дека Иран е подготвен за преговори, но само ако се одвиваат без закани и заплашување од страна на САД.