ИЗБЕГНАТА КАТАСТРОФА Дрон кај аеродромот во Дубровник за малку ќе срушел авион при слетувањето

Вистинска драма се одвивала во непосредна близина на аеродромот во Дубровник на 13-ти април – беспилотно летало опасно се приближило до патнички авион при неговото последно приближување за слетување. Во тој момент авионот се наоѓал на висина од околу 200 метри, а ситуацијата можела да има катастрофални последици.

Екипажот на авионот веднаш го пријавил инцидентот во Хрватската контрола на летање, која ја известила полицијата. Аеродромот во Дубровник беше привремено затворен, а најмалку два патнички летови беа пренасочени кон Сплит.

Хрватската агенција за цивилно воздухопловство соопшти дека неовластениот лет со дрон ја загрозил безбедноста на авионот, патниците, екипажот и луѓето на теренот.

Тие предупредуваат:

„Таквото однесување претставува сериозна закана a може да доведе i до големи финансиски загуби. Според проценките, директната штета по пренасочен лет може да достигне до 190.000 евра, додека индиректната штета – како што се пропуштените деловни и приватни обврски – е немерлива – велат од Агенцијата.

Во Хрватска, летање дронови во близина на аеродроми е дозволено само со посебна дозвола, а дури и во неконтролиран воздушен простор, летањето е ограничено на висина од 120 метри со претходно известување. Прекршителите можат да сметаат на ригорозни казни кои достигнуваат и до 20.000 евра.

Од Агенцијата апелираат за одговорност на корисниците на дронови:

„Дронот можеби некому му изгледа како безопасна играчка, но во погрешни раце станува сериозна закана“, велат од Агенцијата, апелирајќи за одговорност на корисникот.