РУСИЈА ПОСТАВИ КЛУЧЕН УСЛОВ ЗА КРАЈ НА ВОЈНАТА – Украина да се повлече од Донбас
Рускиот портпарол Дмитриј Песков истакна дека ова е „многу важен услов“ за прекин на конфликтот
Портпаролот на Кремљ, Дмитриј Песков, изјави дека украинската армија мора да ја напушти територијата на Донбас, што Русија го смета за клучен услов за прекинување на конфликтот.
„Ставот на Русија е добро познат: Украина и нејзините вооружени сили мора да го напуштат Донбас. Тие мора да бидат повлечени. Ова е многу важен услов“, истакна Песков пред новинарите.
Тој додаде дека Москва не сака јавно да ги открива деталите од преговарачкиот процес со Украина.
Песков потврди дека руската работна група за безбедност ќе отпатува во Обединетите Арапски Емирати во петок наутро за разговори со САД и Украина. Рускиот тим во Абу Даби ќе биде составен исклучиво од претставници на Министерството за одбрана.
Исто така, се очекуваат и билатерални преговори меѓу специјалниот претставник на рускиот претседател за инвестиции и економска соработка, Кирил Дмитриев, и американскиот пратеник Стивен Виткоф, во рамките на работната група за економски прашања, кои треба да се одржат денес или утре.