ПАУЕЛ ПРЕДУПРЕДУВА НА ЕКОНОМСКАТА ДИЛЕМА Тарифите на Трамп носат ризици за стабилни цени и целосна вработеност

Претседателот на Федералните резерви на САД, Џером Пауел, предупреди дека централната банка може да се најде во тешка позиција – помеѓу контролирање на инфлацијата и одржување на економскиот раст. Во својот говор пред Економскиот клуб од Чикаго, тој истакна дека ефектите од тарифите на администрацијата на Доналд Трамп носат зголемена неизвесност и ризици по двојниот мандат на ФЕД – стабилни цени и целосна вработеност.

„Можеби ќе се најдеме во сценарио каде нашите цели се во тензија“, рече Пауел, додавајќи дека ФЕД ќе мора да одлучува врз основа на тоа колку економијата отстапува од секоја цел и во кој временски рок може да се коригира тоа отстапување.

Тој предупреди дека тарифите „веројатно ќе не оддалечат од нашите цели“ до крајот на годината, но нагласи дека ФЕД е во позиција да чека поголема јасност пред да прави прилагодувања на монетарната политика. Пауел не даде конкретни насоки за каматните стапки, но аналитичарите очекуваат намалување во јуни, со можни уште неколку до крајот на 2025 година.

Иако досега тарифите имаа ограничено влијание на цените, Пауел предупреди дека можат да предизвикаат привремено, па и поупорно зголемување на инфлацијата.

„Избегнувањето на таков исход ќе зависи од тоа колку се долготрајни тие ефекти и дали инфлаторните очекувања ќе останат стабилни“, рече тој.

Податоците за БДП во првиот квартал, кои ќе бидат објавени подоцна овој месец, се очекува да покажат забавен раст, и покрај силната продажба на возила. Силниот увоз може дополнително да влијае на растот, бидејќи компаниите се обидуваат да се заштитат од потенцијални нови царини.