ПАД НА ВРАБОТЕНОСТА ВО ИНДУСТРИЈАТА Речиси 3 отсто помалку работници во ноември

Бројот на вработени во индустрискиот сектор во земјава продолжува да опаѓа. Според најновите податоци, во ноември 2025 година бројот на работници во индустријата е намален за 2,9 проценти во споредба со истиот месец лани.

Намалување е евидентирано во сите три клучни индустриски сектори. Најголем пад е забележан во рударството и вадењето камен, каде бројот на вработени е намален за 5,2 проценти. Во преработувачката индустрија има пад од 2,9 проценти, додека во секторот снабдување со електрична енергија, гас, пареа и климатизација намалувањето е поскромно и изнесува 0,3 проценти.

Гледано според главните индустриски групи, бројот на работници е намален кај енергијата, капиталните производи, нетрајните производи за широка потрошувачка, како и кај интермедијарните производи. Единствен позитивен исклучок се трајните производи за широка потрошувачка, каде е регистриран раст на вработеноста од 4 проценти.

На годишно ниво, состојбата останува загрижувачка. Во периодот јануари – ноември 2025 година, бројот на вработени во индустријата е намален за 3,6 проценти во споредба со истиот период од претходната година.

Овие податоци укажуваат на продолжен притисок врз индустрискиот пазар на труд, особено во традиционалните производствени сектори.