ИСТОРИСКИ ДЕН ЗА БУГАРИЈА Од денеска еврото е официјалната валута

Бугарија од денеска, 1 јануари 2026 година, официјално го усвои еврото како своја валута, со што направи значаен чекор напред во својата европска интеграција и се приклучи кон еврозоната. Овој потег претставува важна пресвртница не само за бугарската економија, туку и за иднината на единствената европска валута и за Европската Унија во целина.

Од Европската комисија соопштија дека воведувањето на еврото следи по долг период на интензивни подготовки и спроведување реформи, со кои Бугарија ги исполнила сите неопходни економски и институционални критериуми за членство во еврозоната.

Со користењето на еврото, бугарските граѓани и бизниси ќе имаат низа практични придобивки. Новата валута ќе го олесни патувањето и престојот во другите земји-членки, ќе ја зголеми транспарентноста на цените и ќе придонесе за поголема конкурентност на пазарот. Дополнително, се очекува олеснување на трговијата, намалување на трошоците за конверзија и поголема финансиска стабилност.

Евробанкнотите и евромонетите, како што наведуваат од Европската комисија, ќе станат и симбол на слободите, можностите и придобивките што членството во Европската Унија им ги носи на граѓаните. Комисијата нагласува дека целосно ја поддржувала Бугарија во процесот на пристапување кон еврозоната.

Со приклучувањето на Бугарија, бројот на земји-членки што ја користат заедничката европска валута се зголемува на 21, а повеќе од 357 милиони граѓани на ЕУ сега ќе ја делат истата валута. Истражувањата на јавното мислење покажуваат дека поддршката за еврото останува силна, како во еврозоната, така и во Европската Унија во целина. Според најновите податоци од Евробарометар, мнозинството граѓани веруваат дека еврото е корисно и за Унијата и за нивните национални економии.