ТЕРИТОРИИ ЗА МИР – Путин навестува компромис, но не и повлекување од Донбас

Рускиот претседател Владимир Путин на затворена средба со водечки руски бизнисмени изјавил дека Москва би можела да разгледа ограничена размена на дел од териториите под руска контрола во Украина, но дека конечната цел останува целосна контрола врз Донбас, објави рускиот весник „Комерсант“.

Новинарот Андреј Колесников, кој ја следи работата на Кремљ, наведува дека Путин ги информирал бизнисмените за деталите од потенцијалниот мировен план на средба одржана доцна во ноќта на 24 декември во Кремљ. Според „Комерсант“, Путин потврдил дека Русија сè уште е подготвена да ги почитува отстапките што ги направила за време на разговорите во Анкориџ, но нагласил дека „надвор од Донбас, делумна територијална размена не е исклучена“.

Во меѓувреме, украинскиот претседател Володимир Зеленски изјави дека украинската и американската делегација се приближуваат кон финализирање план од 20 точки по разговорите одржани за време на викендот во Мајами. Сепак, Зеленски нагласи дека сè уште нема согласност околу барањата Украина да се откаже од деловите на Донбас што ги контролира, како и за иднината на нуклеарната централа Запорожје, која моментално е под руска контрола.

Американскиот претседател Доналд Трамп во повеќе наврати вети дека ќе стави крај на најсмртоносниот конфликт во Европа од Втората светска војна наваму. Неговите претставници, Стив Виткоф и Џаред Кушнер, водат разговори со Русија, Украина и европските сојузници. Иако деталите од американските предлози сè уште не се јавно објавени, руските власти често се повикуваат на наводен „консензус“ постигнат меѓу Путин и Трамп на самитот во Анкориџ во август.

Според руските проценки, Москва целосно го контролира Крим, околу 90 проценти од Донбас, три четвртини од регионите Запорожје и Херсон, како и делови од Харковската, Сумската, Николаевската и Днепропетровската област. Путин неодамна повтори дека секој мировен договор мора да се темели на условите поставени во 2024 година: целосно украинско повлекување од Донбас, Запорожје и Херсон, како и формално откажување од членство во НАТО.

„Комерсант“ пишува дека на средбата било отворено и прашањето за нуклеарната централа Запорожје, при што Путин спомнал можност за заедничко руско-американско управување. Според истиот извор, американската страна изразила интерес за крипторударство во близина на централата, која би можела делумно да снабдува електрична енергија и за Украина.