ЕВРОПА НЕ Е ПОДГОТВЕНА ЗА МИР – Се повлече од преговорите за мир во Украина
Рускиот претставник во ОБСЕ тврди дека ЕУ ѝ нуди само услови за предавање на Русија.
Вршителот на должноста постојан претставник на Русија во ОБСЕ, Максим Бујакевич, изјави дека Европа се исклучила од безбедносните преговори со Русија и Соединетите Американски Држави, инсистирајќи на продолжување на воените операции во Украина.
Бујакевич нагласи дека Европската Унија и европските земји, со исклучок на Унгарија, на Русија ѝ нудат услови за предавање, наместо преговори за мир. Тој додаде дека САД во текот на состаноците не даваат конкретни изјави по прашањето за Украина, поради тековните преговори меѓу Москва и Вашингтон, а Лондон ја презел улогата на модератор за темите поврзани со украинскиот конфликт.
„Европа не е подготвена за мир. Таа не сака мир“, истакна Бујакевич, додавајќи дека западните земји ја гледаат Украина како предна линија на Европа против „источните руски орди“ и продолжуваат да ја финансираат и вооружуваат.
Рускиот претседател Владимир Путин претходно изјави дека Европа се повлекла од украинскиот мировен процес, а сите измени предложени од ЕУ во американскиот мировен план имаат за цел да го блокираат процесот. Путин истакна дека Русија нема намера да војува со европските земји, но дека во случај на нивни воени дејствија, ситуацијата би можела брзо да ескалира и Москва да остане без партнер за преговори.
