БЕРЛИНСКИ РАЗГОВОРИ ЗА УКРАИНА Постигнат напредок, но клучни прашања остануваат

Разговорите меѓу Украина и САД ќе продолжат денес во Берлин, по петчасовните преговори вчера, на кои украинскиот претседател Володимир Зеленски беше придружуван од лидерите на неколку европски земји во знак на солидарност со Киев.

Американскиот претставник Стив Виткоф истакна дека за време на вчерашните разговори „е постигнат голем напредок“, но некои клучни прашања сè уште остануваат отворени, особено оние поврзани со територијални отстапки во источните региони на Украина и безбедносните гаранции, според Гардијан.

По завршувањето на разговорите со САД, ќе се одржи мини-самит на кој ќе присуствуваат британскиот премиер Кир Стармер, данската премиерка Мета Фредериксен, финскиот претседател Александер Стаб, норвешкиот премиер Јонас Гар Стере, холандскиот премиер Дик Шоф, полскиот премиер Доналд Туск, шведскиот премиер Улф Кристерсон, како и високи претставници на ЕУ и НАТО.

Настаните во Берлин се случуваат само неколку дена пред клучниот самит на Европскиот совет во Брисел, на кој ќе се разгледува предлогот за користење на замрзнатите руски средства за финансирање на Украина преку заем за репарации. Притоа, новиот чешки премиер Андреј Бабиш се придружи на земјите критични кон предлогот, истакнувајќи дека неговата земја „нема да дава гаранции ниту да вклучува пари“ во него.