АМЕРИКАНСКА ПОКАНА ЗА МАКЕДОНСКАТА МИНИСТЕРКА Божиновска на енергетскиот самит во Атина

Министерката за енергетика, рударство и минерални суровини, Сања Божиновска, ќе учествува на Шестото партнерство за трансатлантска енергетска соработка (P-TEC), што ќе се одржи во Атина, по официјална покана од секретарот за енергетика на Соединетите Американски Држави, Крис Рајт.

Форумот, кој го организира Владата на САД во соработка со грчкото Министерство за енергетика, претставува една од највлијателните платформи за енергетска соработка меѓу Европа и Северна Америка. Настанот ќе го отворат американскиот секретар за енергетика Крис Рајт и грчкиот министер за енергетика Ставрос Папастравру, а ќе учествуваат водечки личности од глобалниот енергетски сектор, претставници на меѓународни институции и големи енергетски компании.

Во рамки на посетата, министерката Божиновска ќе оствари и билатерална средба со секретарот Рајт, на која ќе се разговара за можности за продлабочување на енергетската соработка, како и за нови инвестиции во регионалните енергетски коридори.

Министерката ќе присуствува и на прием организиран од Амбасадата на САД во Атина, на покана на амбасадорката Кимберли Гилфојл, во чест на американските секретари за внатрешни работи и енергетика и нивните тимови кои престојуваат во Грција како дел од програмата на P-TEC.

Форумот ќе опфати теми поврзани со енергетската безбедност, нуклеарната технологија, финансирањето на инфраструктурата, природниот гас како фактор на новата енергетска поврзаност во Европа и улогата на вештачката интелигенција во трансформацијата на енергетските системи.

Учеството на министерката Божиновска на овој значаен форум претставува потврда за зголемениот интерес и позиционирање на Македонија во рамките на трансатлантските енергетски иницијативи, како и за континуираниот ангажман на Владата за јакнење на енергетската стабилност, диверзификација на изворите и пристап до современи технологии и инвестиции.