МВР СО НОВИ ТЕСТОВИ ЗА ДРОГА ПРЕКУ ПЛУНКА – Резултат за 10 минути

Министерството за внатрешни работи набавува нова генерација брзи тестови за откривање на дрога кај возачи.

Станува збор за имунохроматографски тестови преку плунка, кои се едноставни за употреба и не бараат медицинско знаење. Примерокот се зема за помалку од една минута со орален брис, а резултатите се добиваат најдоцна за 10 минути – без дополнителна електронска опрема.

Тестовите детектираат шест вида психоактивни супстанции:

• канабис (THC)

• кокаин

• амфетамин и метамфетамин

• опијати (морфин, хероин)

• екстази (MDMA)

• бензодиазепини

Производите се во согласност со европските стандарди, имаат CE и ISO 13485 сертификати и веќе се користат во полициски служби во Европа. Тие ќе бидат индивидуално пакувани со јасни ознаки и рок на траење од најмалку 12 месеци.

Добавувачот, доколку е потребно, ќе обезбеди бесплатна обука за полициските службеници за правилно користење. Испораката треба да се изврши најдоцна 30 дена по потпишувањето на договорот, а упатствата ќе бидат достапни и на македонски јазик.

Со оваа набавка, полицијата добива современ инструмент за откривање дрога кај возачи, што според МВР ќе придонесе за значително зголемување на безбедноста на патиштата.