ЗАКОНОТ УДРИ ВО 5 ЧАСОТ НАУТРО Рушење на бесправен објект во Гази Баба
Акцијата почна во 05:00 часот со асистенција на МВР, откако инвеститорот ги игнорирал сите забрани
Општина Гази Баба рано изутринава започна акција за уривање на бесправно изграден објект во населбата Инџиково. Како што информира градоначалникот Бобан Стефковски, интервенцијата почнала во 05:00 часот, по претходна координација со Министерството за внатрешни работи.
Станува збор за објект во карабина-фаза, изграден во приземје, со јасна намера за надградба на уште еден кат, и покрај изречените забрани од надлежните институции.
„И покрај донесеното решение од градежниот инспектор за стопирање на градбата и затворање на градилиштето, инвеститорот не постапил по истото и продолжил со градежни активности“, изјави Стефковски.
Градоначалникот упати апел до граѓаните да не започнуваат градби без соодветна документација, потенцирајќи дека законите ќе се применуваат доследно и еднакво за сите.
