ВРЕМЕНСКА ПРОГНОЗА Следуваат нови снежни врнежи и пад на температурите

Во текот на денешниот ден во земјава ќе преовладува променливо облачно време со повремени сончеви интервали, а ќе дува слаб до умерен ветер од јужен правец. Како што информира Управата за хидрометеоролошки работи, кон крајот на денот и во текот на ноќта, во северозападните региони се очекуваат повремени врнежи од дожд, додека на планинските предели врнежите ќе преминуваат во снег.

Утринските температури ќе се движат од минус девет до минус два степени, додека дневните максимуми ќе достигнат вредности меѓу еден и девет Целзиусови степени.

Во Скопје се најавува слична временска слика – променлива облачност со сончеви периоди и слаб ветер од променлив правец. Максималната дневна температура во главниот град ќе биде околу четири степени.

За време на претстојниот викенд, според најавите на синоптичарите, следува нов бран врнежи. На повисоките и планинските подрачја тие ќе бидат од снег, додека во пониските делови ќе има мешавина од дожд и снег. Најинтензивни врнежи се очекуваат во западните делови од земјата, каде што снежната покривка дополнително ќе се зголемува.

Во недела и понеделник се прогнозира засилен северен ветер, кој на одредени места може да достигне брзина и над 60 километри на час. Ќе има повремени локални снежни врнежи, а температурите ќе бележат пад и на повеќе места ќе останат под нулата дури и во текот на денот.